Ադրբեջանին ոչ ոք չի կարող փրկել սնանկացումից. խորհրդարանի նախկին խոսնակ

Lurer.com–ը գրում է.

Համեմատություններ անցկացնելով Հունաստանում ստեղծված իրավիճակի հանգամանքների հետ՝ Ադրբեջանի խորհրդարանի նախկին խոսնակ Ռասուլ Գուլիեւը, ով ներկայում որպես վտարանդի բնակվում է ԱՄՆ-ում, համոզմունք է հայտնել, որ Ադրբեջանը կանգնած է սնանկացման շեմին եւ դրանից ոչ ոք նրան չի կարող փրկել:

Ինչպես հաղորդում է «Արմենպրես»-ը, ադրբեջանական «Հուրրիեեթ» թերթին տված հարցազրույցում իր համոզմունքը հիմնավորելու համար Գուլիեւը նշել է, որ ինչպես այժմ Ադրբեջանում է, Հունաստանում եւս 37 տոկոսով կրճատվել էր չինովնիկների եւ աշխատավորների թիվը, ոչ արդյունաբերական հաստատությունների վրա չափից ավելի փող էր ծախսվում, ոչ մի ուշադրություն չի դարձվում արդյունաբերական ոլորտին, աշխատավարձերը 33 տոկոսով նվազեցվել են, բանկային համակարգը փլուզվել է եւ այլն:

«Արդյունքում՝ որոշ ժամանակ հետո երկրի սնանկացումը հնարավոր չեղավ կանխել: Իսկ Ադրբեջանում, ավելին, մանաթի փոխարժեքը կայուն պահելու համար արտարժույթի պահուստները արագորեն դատարկվում են», -ասել է նա:

Գուլիեւի կարծիքով` եթե Ադրբեջանը տարեկան բյուջետային ծախսերը գրեթե կիսով չափ չկրճատի, ապա ոչ ոք չի կարող երկիրը փրկել դեֆոլտից, մանաթի ամբողջությամբ արժեզրկումից:

«Ավստրիան, Չեխիան եւ Հունաստանը նույնքան բնակչության նույն թիվն ունեն, ինչ որ Ադրբեջանը: Ի տարբերություն Ադրբեջանի՝ այդ երկրները բնական հարստություններ չունեն: Սակայն, Ավստրիայում արտադրության տարեկան ծավալը կազմում է 400 մլրդ դոլար, Հունաստանում` 240 մլրդ դոլար, Չեխիայում` 205 մլր դ դոլար, իսկ Ադրբեջանում` էներգակիրների առեւտրից ստացված արտարժույթի հետ միասին` 80 մլրդ դոլար: Այդ երկրները կապված են Եվրոպայի Կենտրոնական բանկի վարկային համակարգի հետ եւ հեշտությամբ պաշտպանվում են տարբեր ֆինանսական փորձություններից: Այդ պատճառով հիշյալ երկրներում մեկ կամ կես տարում չի կարող սնանկացում տեղի ունենալ: Օրինակ` Հունաստանի սնանկացման գործընթացը տեւեց մոտ 10 տարի: Սակայն, ոչ մի միջագային կառույցի պաշտպանական համակարգին չմիացած եւ միայն գազի եւ նավթի ռեսուրսներից կախված Ադրբեջանի նման երկրներում սկսված սնանկացումն ու դրա` քաոսով ավարտը կարող է տեղի ունենալ անգամ մեկ ամսվա ընթացքում», -նշել է նա:

Ռասուլ Գուլիեւի կարծիքով` եթե Ադրբեջանը պետբյուջեի ծախսերը նվազագույնը 6 մլրդ մանաթով չկրճատի, ապա ոչ ոք չի կարող նրան փրկել դեֆոլտից եւ մանաթի ամբողջությամբ արժեզրկումից: