«Բացառվում է, որ Ղարաբաղը դիտվի քրեական հետապնդման մեջ գտնվող մարդկանց համար թաքստոց». Արցախի վարչապետ
Header
GalaTV.am-ը գրում է.
Ինչպես հայտնի է, ռուսաստանցի գործարար Գերման Ստերլիգովը մի քանի օր է հայկական երկրորդ հանրապետությունում է, ու ռուսաստանյան լրատվամիջոցներին տված հարցազրույցներում Ստերլիգովն ու նրա կինը փաստում են, որ Արցախում բնակություն հաստատելու համար են տեղափոխվել: Այնինչ Արցախի իշխանություններից նշում են, որ իրենց տեղեկություններով Ստերլիգովն ու նրա ընտանիքի անդամները զբոսաշրջիկներ են:
Արցախի վարչապետ Արայիկ Հարությունյանը ԳԱԼԱ-ի հետ զրույցում նշեց, թե ընդհանուր առմամբ Արցախի իշխանությունները ողջունում են այն մարդկանց, ովքեր Արցախն ընտրում են հանգստի կամ բնակության վայր, սակայն այն դեպքում, երբ Արցախ մեկնողներն ինչ-որ խնդիրներ չունեն:
«Մենք ողջունում ենք բոլորին, ովքեր ուզում են հաստատվել Արցախում, մանավանդ որեւէ խնդիր կամ քրեական անցյալ չունեն, իր մասով այսօր որեւէ կոնկրետ բան ասել չեմ կարող, քանի պաշտոնական դիմում չենք ստացել, քաղաքացիության հետ կապված որեւէ բան չկա, ինքը սովորական զբոսաշրջիկ է: Բայց քաղաքացին միլիարդատեր է եղել, պետք է ուշադիր լինենք, ու երբ որ ինչ-որ կոնկրետություն լինի, տեղյակ կպահենք»,- ասաց Արցախի վարչապետը:
Արայիկ Հարությունյանից հետաքրքրվեցինք, թե այնուամենայնիվ Արցախի իշխանությունները որոշակի մտահոգություններ ունե՞ն այս հարցում, եւ կամ մտադրություն կա՞ արդյոք հանդիպում կազմակերպել ռուսաստանցի գործարարի հետ հասկանալու համար, թե ինչն է ի վերջո Ստերլիգովին Արցախ բերել. «Մենք այդ ուղղությամբ աշխատանքներ տանում ենք, թե ինչու, ինչ պատճառով եւ ինչպես պետք է լինի: Մեզ համար կարեւորն այն է, որ այդ մարդն իր թիկունքում խնդիրներ չունենա: Մենք ողջունում ենք բոլորին, ովքեր գալիս են Արցախ: Շատ մարդիկ են գալիս, ուղղակի ինքը որ հարուստ է, ուշադրություն է գրավել: Թե չէ բացառվում է՝ Ղարաբաղը դիտվի քրեական հետապնդման մեջ գտնվող մարդկանց համար թաքստոց, հակառակը, մենք պայքարում ենք նման մարդկանց դեմ, այսինքն եթե մտահոգություններ ու խնդիրներ լինի, մենք արձագանքելու ենք, քանի որ Արցախը թաքստոց չէ»,- մեզ հետ զրույցում ասաց Արայիկ Հարությունյանը:
Անդրադառնալով մեր այն հարցին, թե ի՞նչ որոշում կկայացնեն Արցախի իշխանությունները, եթե Ստերլիգովն ու իր ընտանիքի անդամները որոշեն քաղաքացիություն ձեռք բերել, Արայիկ Հարությունյանն արձագանքեց. «Նախ սահմանադրության պահանջները պետք է նայենք, հետո նա պետք է նախկին բնակության վայրից դուրս գրվի, գան, ցանկություն հայտնեն, մի խոսքով, ամեն ինչը կնայենք…»,- ասաց Արցախի վարչապետը՝ չբացառելով նաեւ այն, որ ցանկության դեպքում Ստերլիգովին հնարավորություն կտրվի Արցախում ներդրումներ կատարել.
«Մաքուր փողերով ներդրումներն է երաշխավորվում Արցախում, այդ դեպքում ստեղծում ենք պայմաններ ներդրումների համար: Տեսնենք ինչ կլինի, տեսնենք միանգամից տեղափոխվելը ինչ է նշանակում, սպասենք, տեսնենք»,- եզրափակեց վարչապետը:
1
2
3
4
5
1
2
4
5
3
4
