Հայաստանից ամենաշատ Եգիպտոս ու Վրաստան են մեկնում հանգստի

Lragir.am-ը գրում է.

Վերջին շրջանում Եգիպտոս հանգստի մեկնող հայաստանցի զբոսաշրջիկների թվի նվազում է նկատվում՝ պայմանավորված Արտաքին գործերի նախարարության հայտարարությամբ, որով զբոսաշրջիկներին կոչ էր արվում Եգիպտոսում հանգստյան գոտիներից դուրս չգալ:

Ու չնայած սրան, ինչպես նախորդ տարիներին, այնպես էլ այս տարի, ամռան ամիսներին արտերկրում իրենց հանգիստը կազմակերպող հայաստանցիների մեծամասնությունը նախընտրում է Եգիպտոսը:

Lragir.am-ը տուրիստական գործակալությունների շրջանում կատարած հարցման արդյունքում պարզեց նաև, որ այս տարի հայերն ավելի քիչ են արտերկիր հանգստի մեկնում, սա հավանաբար բացատրվում է սոցիալ-տնտեսական պայմանների վատթարացմամբ:

Եվրոտուր տուրիստական գործակալության տնօրեն Լևոն Գևորգյանը Lragir.am-ի հետ զրույցում ասաց, որ հայաստանիցներն ամենաշատը հանգստի մեկնում են, Եգիպտոս, Վրաստան ու եվրոպական երկրներ:

Եգիպտոսում հանգստի տուր փաթեթի գներն սկսվում են մեկ անձի համար 350 դոլարից: «Դեպի Եգիպտոս վերջին շրջանում հոսքը մի քիչ նվազել է, բայց այնպես չէ, որ ընդհանրապես չեն գնում: Այս տարի հանգստի մեկնողների թիվը նվազել է, դե պարզ է, հանգստի մեկնելն առաջին հերթին ֆինանսով է պայմանավորված»,- ասաց նա:

Շելբի տուր ընկերությունից էլ տեղեկացանք, որ այս տարի հայերն ավելի քիչ են հանգստի նպատակով մեկնում Թուրքիա: Ընկերությունից ասացին, որ Եգիպտոսի վերաբերյալ հայտարարության պատճառով հանգստի մեկնողներն անորոշ վիճակում են հայտնվել:

“Անհասկանալի իրավիճակ է, մարդիկ գնում են, բայց ամեն դեպքում վերջին մեկ շաբաթվա ընթացքում սկսել են խուսափել: Մենք այնտեղ ունենք զբոսաշրջիկներ, մշտական կապի մեջ ենք, երբեք խնդիրներ չեն լինում: Իրականում այսօր էլ խնդիր չկա, տուրիստներն իրենց համար հանգիստ հանգստանում են: ԱԳՆ-ն հայտարարություն արեց, բայց հիմք չներկայացրեց, թե ինչու: Այսօր կա մի զանգված, որը վախենում է մեկնել Եգիպտոս, հրաժարվում է տուր փաթեթից”,- փոխանցեց գործակալության աշխատակիցը:

Շելբի տուրից նույնպես ասացին, որ մատչելիության համար հայերը հիմնականում մեկնում են Վրաստան ու Եգիպտոս, իսկ ավելի շատ ֆինանսական հնարավորություններ ունեցողները հիմնականում եվրոպական ծովափնյա քաղաքներն են գերադասում:

Չնայած Հունաստանում առկա վիճակին, դեպի Հունաստան հանգստի մեկնողների թիվը նվազման միտում չի դրսևորում:

Գոլդ թրավել ընկերությունից էլ ասացին, որ ավելի շատ մարդիկ հանգստի մեկնում են Եգիպտոս ու Դուբայ, դեպի Եգիպտոս մեկնողների թիվը վերջին մեկ շաբաթում նվազել է: «Այնտեղ իրենք նորմալ վիճակում են, ոչ մի խնդիր չկա, մենք կապ հաստատում ենք մեր հաճախորդների հետ: Խնդիր չկա, ուղղակի ովքեր չեն գնացել, զգուշանում են գնալ»,- ասաց ընկերության աշխատակցուհին՝ հավելելով, որ այսօր Եգիպտոս ավելի շատ են մեկնում հանգստանալու, քան Վրաստան:

Շարունակվում է այն միտումը, որ հայաստանցիները գերադասում են Թբիլիսիից մեկնել արտերկիր հանգստի, քանի որ այնտեղ ավիատոմսերն ավելի էժան են: Հիմնականում եվրոպական ուղղություններով մեկնողներն են այդ քայլին դիմում, քանի որ ավիատոմսերի գների զգալի տարբերություն կա: Լևոն Գևորգյանի խոսքով՝ կան ուղղություններ, որ Հայաստանում Վրաստանի համեմատ անգամ ավիատոմսերի կրկնակի թանկ գներ են գործում: