Վարդենիս-Ղարաբաղ ճանապարհը կառուցվում է ամենաբարձ որակին համապատասխան. Արա Վարդանյան

Tert.am-ը գրում է.

Վարդենիս-Ղարաբաղ ճանապարհի շինարարական աշխատանքների Հայաստանի հատվածի, որը կազմում է 11 կմ ամբողջովին ավարտին է հասցվել և ներկայումս ընթանում են Արցախի հատվածի աշխատանքները: Tert.am-ի հետ զրույցում այս մասին ասաց «Հայաստան» համահայկական հիմնադրամի գործադիր տնօրեն Արա Վարդանյանը՝ նշելով, որ ներկա փուլում ընթանում է շինարարներին բետոնի մատակարարումը, որից հետո կսկսվի ասֆալտապատումը:

«Շինարարական աշխատանքները իրականացնում են 6 ընկերություններ, ամեն օր նրանց մատակարարվում է 20-30 տոննա բետոն է, այսինքն՝ աշխատանքները համաչափ են իրականացվում»,- ասաց նա:

Արա Վարդանյանը վստահեցրեց, որ ճանապարհը կառուցվում է ամենաբարձր որակին համապատասխան, ընդ որում, շինարարական կազմակերպությունները 5 տարվա երաշխիքային սպասարկում են իրականացնելու:

«Համաձայն պայմանագրի գումարի վերջին 5 %-ը վճարվելու է հինգ տարի անց, և այս տարիների ընթացքում, եթե ճանապարհը վնասվում է կամ ի հայտ է գալիս որևէ թերություն, նրանք պարտավորում են սեփական միջոցներով վերացնել դրանք: Այնուհետև հինգ տարի անց ստանում են գումարը: Այսինքն՝ այս դեպքում շինարարները շահագրգռված են լավ կառուցել ճանապարհը: Մենք էլ գրեթե ամեն օր իրականացնում ենք ստուգումներ՝ լաբորատոր ու վիզուալ, որպեսզի համոզված լինենք, որ ամեն ինչ արվում է բարձր մակարդակով»,- ասաց նա:

Խոսելով ճանապարհի կառուցման ժամկետների մասին, Արա Վարդանյանն ընդգծեց, որ ամեն ինչ կախված է եղանակներից, բայց հույս ունեն, որ մինչև տարեվերջ կավարտեն 90%-ի չափով:

«Գումարի չափը բավարարում է, ընդհանուր առմամբ ճանապարհի արժեքը 33 մլն ԱՄՆ դոլար է կազմում, որից մոտ 12-12.5%-ը համահայկական հիմնադրամի հավաքած գումարն է, մնացածը տրամադրում է ՀՀ կառավարությունը»,- ասաց նա:

Անդրադառնալով աշխատուժին հիմնադրամի տնօրենը նշեց, որ շուրջ 300 հոգի ներգրավված է ճանապարհի կառուցման գործին:

«Շինարարական կազմակերպությունները հիմնականում ԼՂՀ-ից են, քանի որ նրանց վրա ավելի էժան է նստում ծախսը՝ տեղափոխման շատ հարցեր չունեն»,- ասաց նա: