Թուրք քաղհասարակության քայլերը կարող են հանգեցնել նրան, որ ապագայում կառավարությունը ևս փոխի մտածելակերպը. Էնդրյու Վուլֆորդ

Tert.am-ը գրում է.

Որքան շատ մարդիկ իմանան ցեղասպանությունների մասին, այնքան դժվար կլինի դրանք ժխտելը, որքան շատ երկրներում լինեն ցեղասպանագետներ ու թանգարաններ, այնքան շուտ կարելի է փակել մերժողականության պատուհանը: Tert.am-ի հետ զրույցում նման կարծիք հայտնեց Ցեղասպանության միջազգային ընկերակցության նորընտիր նախագահ Էնդրյու Վուլֆորդը:

«Ասոցիացիան միշտ աջակցել է այն երկրներին, ովքեր ցանկացել են որոշակի գիտելիքներ ձեռք բերել ցեղասպանության մասին: Ցեղասպանության նկատմամբ ոչ անտարբեր պետությունները վայելում են ասոցիացիայի աջակցությունը»,-ասաց նա:

Հարցին, թե ինչպիսի նշանակություն ունի Հայոց ցեղասպանությունը ընդհանրապես ցեղասպանագիտության համար և ինչպիսի դեր է խաղացել նման ճակատագիր ունեցող այլ ժողովուրդների համար,  Էնդրյու Վուլֆորդը պատասխանեց. «Մենք տարբեր գիտնականների խմբակ ենք, մեզ հետ համագործակցում են գիտնականներ ամբողջ աշխարհից: Հայոց ցեղասպանությունը մեր ընկերակցության յուրաքանչյուր գիտնականի համար ազդեցիկ է և ամբողջովին հիմնավոր։ Հազիվ թե որևէ մեկը կասկածի այդ հարցում»:

Անդրադառնալով ցեղասպանությունների ճանաչման գործին, Ցեղասպանության միջազգային ընկերակցության նախագահը նշեց, որ դրանցից մեկը կարող է լինել իրավական ճանապարհը, որով թեև իրենք չեն զբաղվում, սակայն իրենց շարքերում կան այնպիսի գիտնականներ, որոնք զբաղվում են ցեղասպանության իրավական մեխանիզմների հարցերով:

Մասնագետն անդրադարձավ նաև Թուրքիայում Հայոց ցեղասպանության ժխտողական քաղաքականությանը և այդ համատեքստում թուրքական առաջադեմ հասարակության կարծիքի տրանսֆորմացիային` նշելով, որ ժամանակ է հարկավոր, որպեսզի մարդկանց մտածողության մեջ ինչ-որ բան փոխվի:

«Նրանց ազգային ինքնության մեջ է այդպես է դրված, որ պետք է մերժեն տեղի ունեցածը:
Բայց շատ լավ է, որ մյուս կողմից քաղաքացիական հասարակության քայլերը ձեզ համար տեսանելի են և դրանք կարող են հանգեցնել նրան, որ կառավարությունը ևս փոխի մտածելակերպը ինչը, սակայն հաստատ արագ տեղի չի ունենալու: Վստահ եմ, որ այն հաստատ վերջնականապես կփոխվի, քանի որ ժողովուրդը մի օր ուղղակի կստիպի»,-ասաց նա: