«Սա պետություն է, Սերժ». «Փաստ»

«Փաստ» օրաթերթը գրում է.

Վերջին օրերին Ջրառատ գյուղում արձակված կրակոցների առաջամարտիկ Լեռնիկ Երանոսյանը, ով հանրությանը հայտնի դարձավ Սարի թաղի դեպքերի ժամանակ խաղաղ ցուցարարների վրա նռնակ նետելով, ինչպես պարզվեց, վերականգնվել է իր պաշտոնում:

Ավելին՝ ոստիկանության լրատվական բաժնից պարզեցինք, որ ՀՔԾ–ն, քննելով Սարի թաղի ու Խորենացի փողոցի գործողությունների ժամանակ ոստիկանների կողմից ոչ համաչափ ուժ կիրառելու գործը, գտել է, որ ո՛չ Լեռնիկ Երանոսյանի, ո՛չ Խորենացի փողոցում քաղաքացիներին սեռական բնույթի հայհոյանքներ տվող Լևոն Երանոսյանի գործողությունների մեջ հանցակազմ չկա: Սա այն դեպքում, երբ Լևոն Երանոսյանն անմիջականորեն ղեկավարում էր ոստիկանության գործողությունները, իսկ Լեռնիկ Երանոսյանն անձամբ նռնակ էր նետում խաղաղ ցուցարարների ու լրագրողների վրա: Այդ գործողությունների արդյունքում 16–ամյա պատանին կորցրեց աչքը, լուրջ այրվածքներ ստացան ու տուժեցին բազմաթիվ քաղաքացիներ ու լրագրողներ, ու այժմ մոտ 70 հոգի բանտում է:

Ուշագրավ է նաև, որ հենց ոստիկանապետ Վլադիմիր Գասպարյանի հրամանով անցյալ տարվա օգոստոսի 5–ին «դադարեցվեցին ՀՀ ոստիկանության զորքերի շտաբի օպերատիվ բաժնի պետի տեղակալ, գնդապետ Լեռնիկ Երանոսյանի լիազորությունները», իսկ այժմ ոստիկանությունից պնդում են, որ լիազորությունները ընդամենը կասեցվել էին: «Լեռնիկ Երանոսյանի լիազորությունները կասեցված են եղել, նա ազատված չի եղել աշխատանքից, ընդամենը իր գործունեությունը կասեցված է եղել: Հիմքը այն է եղել, որ ինքը ՀՔԾ–ում գործով որպես վկա է եղել, ընդամենը էդ է եղել, ու կասեցումից դուրս է եղել: Հետագայում, քանի որ ինքը վկայի կարգավիճակ ուներ, վերականգնվեց իր գործունեությունը»,– «Փաստին» ասացին ոստիկանությունից: Ի դեպ, Լեռնիկ Երանոսյանը նախկինում դիտավորյալ հանցագործության համար դատապարտված է եղել:

Երեկ «Ազատության» հետ զրույցում Ջրառատում հրազենային վիրավորում ստացած 26–ամյա Հակոբ Մելքոնյանի հայրն ասել է, թե Լեռնիկ Երանոսյանն անձամբ է ատրճանակն ուղղել իր մյուս տղայի վրա՝ ստիպելով ծնկի գալ: Մեր հարցին, թե հնարավոր է Ջրառատի դեպքերի առթիվ ևս կասեցվեն Լեռնիկ Երանոսյանի լիազորությունները, ոստիկանությունից նման պատասխան տվեցին. «Երբ որ կունենանք հրաման, կիմանաք»:

Հիշեցնենք, որ տարեմուտին նախագահ Սերժ Սարգսյանը «Հասարակական կարգի գերազանց պահպանման համար» մեդալ շնորհեց Խորենացի փողոցում քաղաքացիներին անձամբ սեռական բնույթի հայհոյանքներ տվող ՀՀ փոխոստիկանապետ Լևոն Երանոսյանին: «Ա1+»–ը Խորենացիում նկարահանել էր, թե ինչպես է ոստիկանության զորքերի հրամանատար, փոխոստիկանապետ Լևոն Երանոսյանը սեռական բնույթի հայհոյանք տալիս ձեռնաշղթաներ հագցրած քաղաքացուն, որին ոստիկանները կռացրած բերման են ենթարկում փողոցում:

«Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը «Փաստի» հետ զրույցում անդրադառնալով Լեռնիկ Երանոսյանի վերանշանակմանը, ասաց. «Ոստիկանությունը թքած ունի հասարակության վրա, եթե ակնհատ ապօրինի, անբարո վարքագծով անձը կարող է նորից վերականգնվել պաշտոնում և գաղտնիության սկզբունքով իրականացված քննությամբ: Թող հրապարակեն, տեսնենք, թե ինչ հիմքեր է գտել ոստիկանությունը նրան վերականգնելու: Հասարակությունը մերժում է այդ տիպի անձանց և օրինապահության նման ներկայացուցիչն է երկրում ստեղծում էսպիսի մթնոլորտ և իրավիճակ, երբ բոլոր դժգոհում են: Ես չեմ հասկանում՝ ինչու է ոստիկանապետին պետք, որ հենց այդպիսի մարդիկ իր կողքին լինեն»,– ասաց իրավապաշտպանը:

Իրավապաշտպան Վարդան Հարությունյանը կատարվածի մեջ զարմանալի բան չի տեսնում և քննադատության սլաքներն էլ չի պատրաստվում ուղղել ոստիկանների կամ ոստիկանության դեմ: «Ոստիկանները կատարել են քաղաքական իշխանության հանձնարարականը: Բաղրամյան 26–ից իջած հրահանգներն են կատարել: Բոլոր գործողությունների համար՝ կլինի դա նռնակ նետել, մարդկանց ծեծել, շինծու քրեական գործեր սարքել, թե մարդաորս կազմակերպել, ամեն ինչի համար թիվ մեկ պատասխանատուն երկրի քաղաքական իշխանությունն է ու Բաղրամյան 26–ը, հետո նոր կարող են հիշատակվել առանձին վերցված ոստիկաններ կամ ոստիկանությունը: Այլ խնդիր է, որ այդ հանձնարարություններն անօրինական էին, և նրանք կարող էին չկատարել: Հակառակ դեպքում մեկ ուրիշ Երանոսյան կգտնվի, որ տեղ կհասցնի Բաղրամյան 26–ից իջած հրահանգները: Պետք է հասնել նրան, որ Բաղրամյան 26–ից նման հրահանգներ չիջնեն»:

Թերևս արժե, որ նախագահ Սերժ Սարգսյանն այս օրերին վերհիշի ժամանակին իր իսկ գրած պատասխան հոդվածը հանրահայտ երգիչ Սերժ Թանկյանին՝ «Սա պետություն է, Սերժ» հայտնի վերնագրով:

Շարունակությունը` «Փաստ» օրաթերթի այսօրվա համարում: