ՎիվաՍել-ՄՏՍ. Տասը տարվա հաջողությունները

Լևոն Մութաֆյանը ֆեյսբուքյան իր էջում գրում է.

Իր առաջին տասնամյակը նշեց Հայաստանում կորպորատիվ կառավարման առաջավոր մեթոդներն ամրակայող, սպասարկման ոլորտում առաջատարի դիրքը որևէ մեկին չզիջող ՎիվաՍել-ՄՏՍ ընկերությունը: Մի ընկերություն, որի ամեն մի նախաձեռնություն ու քայլ ունի խոր իմաստավորում և բովանդակություն, որը երբևէ չհեռանալով իր ֆինանսական ու կորպորատիվ շահերից՝ ամեն ինչ անում է հանուն սպառողի, հանուն բարձրակարգ ծառայությունների մատուցման:

Տասը տարվա ընթացքում Հայաստանում տարբեր ընկերություններ են գրանցվել և գործունեություն ծավալել, ամեն մեկն ունեցել է իր գաղափարախոսությունը, մեթոդաբանությունը:Ծավալելով առողջ մրցակցություն և անընդհատ ընթանալով կատարելագործման ճանապարհով, Ռալֆ Յիրիկյանի գլխավորած ընկերությունը հաստատել է մի բան. Ժամանակակից սպասարկումը չի կարող լինել ինքնաբավ, չի կարող նիրհել հաջողությունների վրա, այն պիտի լինի մշտական շարժման ու որոնումների, նորի արմատավորման հարահոսի մեջ՝ մեկտեղելով այն առաջավորն ու ընդունելին, որոնց հենքում կատարելագործված հեռախոսակապի ձևավորումն է: 

Հիշատակենք մի շարք ձեռքբերումներ, որոնք արձանագրվել են ընկերության գոյության տասը տարվա ընթացքում: Հայաստանի հեռահաղորդակցության առաջատար օպերատորն առաջինն է մի շարք ցուցանիշներով. շուկայում ընկերության մասնաբաժինը կազմում է ավելի քան 60%ՙ ավելի քան 2 միլիոն բաժանորդներով, որոնցից 1,12 միլիոնն օգտվում է տվյալների փոխանցման ծառայություններից: ՎիվաՍել-ՄՏՍ-ն ավելի մոտ է դարձել իր հաճախորդներինՙ հանրապետության ամբողջ տարածքում գործող 92 սպասարկման կենտրոնների միջոցով, որոնցից 2-ն աշխատում են շաբաթական յոթ օրՙ շուրջօրյա սկզբունքով: 494 ռոումինգ գործընկերների միջոցովՙ ընկերությունը ռոումինգ ծառայություններ է տրամադրում աշխարհի 196 երկրում: 615 բնակավայրերում (այդ թվումՙ 48 քաղաքներում) մինչեւ 42,2 Մբիթ/վրկ արագություն ապահովող DC HSDPA-ի հասանելիությամբՙ Հայաստանում ամենաընդարձակ 3.5G ցանցն ընկերության գլխավոր առավելություններից էՙ բաժանորդներին ձայնային եւ տվյալների փոխանցման բարձրորակ ու նորարարական ծառայություններ մատուցելու հարցում:

ՎիվաՍել-ՄՏՍ-ը Հայաստանի անգերազանցելի առաջատարն է բջջային ցանցի ծածկույթով: 3G ցանցը (ավելի քան 1175 բազային կայան) հասանելի է բնակչության 98,8%-ին, իսկ 2G ցանցի ծածկույթը կազմում է 99,8%: 2009թ.-ին ընկերությունն էլ ավելի նորարարական ծառայություններ է առաջարկել իր բաժանորդներինՙ առաջին անգամ Հայաստանում գործարկելով ներբեռնման մինչեւ 150 Մբիթ/վրկ արագություն ապահովող 4G/LTE ցանցը: Ներկայումս 4G ցանցը (շուրջ 250 բազային կայանով) հասանելի է բնակչության 45,7%-ին ՙ ներառելով Հայաստանի 7 քաղաք: Սերտորեն շաղկապելով բիզնես գործունեությունը հասարակության հանդեպ ստանձնած պարտավորություններինՙ ՎիվաՍել-ՄՏՍ-ը տասը տարիների ընթացքում շուրջ 28,9 միլիարդ դրամ է հատկացրելՙ Կորպորատիվ սոցիալական պատասխանատվության եւ հովանավորության ծրագրերի իրականացման համար:

Ընկերության կապիտալ ներդրումները կազմում են ավելի քան 182 միլիարդ դրամ: 2005-2015 թթ.-ի ընթացքում շարժական կապից եւ հարակից գործունեությունից հասույթը կազմել է ավելի քան 675,4 միլիարդ դրամ: Նույն ժամանակահատվածում ՎիվաՍել-ՄՏՍ-ը, որպես Հայաստանի խոշոր հարկատու, 188,2 միլիարդ դրամի հարկային պարտավորություններ է կատարել պետական բյուջեի նկատմամբ: Ստեղծման օրվանից մինչ օրս, դառնալով 1400 խանդավառ ու փորձառու աշխատակիցներից կազմված թիմ (աշխատակիցների միջին տարիքը 34 է), ընկերությունը 66 միլիարդ դրամ է հատկացրել աշխատավարձային ֆոնդին: Մրցակցային աշխատավարձից բացիՙ աշխատակիցներին առաջարկվում են տարատեսակ սոցիալական խրախուսումներ:

Սրանք ընկերության հաշվետվությունից վերցված տվյալներ են, որոնք վաղուց արդեն ձևավորել են այն բարի պատմությունը, որը սերտակցվել է երկրի պատմությանը, որը դարձել է բոլորի սեփականությունը: Բայց չէր լինի այս ամենը, եթե ընկերությունը չձևավորեր կառավարման հստակ հայեցակարգեր, եթե ամեն ինչի առանցքում չլիներ թիմային-հայեցակարգային գործունեությունը: Արդի գործարարությունն առ ոչինչ է առանց գիտականացման, առանց տնտեսագիտական հստակ հաշվարկների, առանց ընդգծված քաղաքականության:

Իսկ այս ամենն առկա է, որովհետև ընկերությունում ոչ անձնային շահերն են, այլ պետական, ազգային: Չէր լինի այս ամենը, եթե գլխավոր տնօրեն Ռալֆ Յիրիկյանը չներդներ կորպորատիվ կառավարման այնպիսի եղանակներ, որոնք այսօր հաջողություն են բերում աշխարհի շատ խոշորագույն ընկերությունների: Այսինքն, Ռալֆ Յիրիկյանը հրաժարվեց կառավարման ավանդական մեթոդներից և եղանակներից և այստեղ ներդրեց գիտականորեն հիմնավորված և տնտեսապես արդարացված եղանակներ: Հենց այստեղ է ընկերության հաջողության գրավականը:

Կարելի է լինել լավ կազմակերպիչ, հանրության բարօրությամբ մտահոգված անհատ, սակայն չունենալ հաջողություններ տնտեսության մեջ: Կարևորը ժամանակի ու տնտեսական հարաբերությունների հայեցակարգերի իմացությունն է, դրանց փոխկապակցումը գործնական վճիռներին ու որոշումներին: Եվ Ռալֆ Յիրիկյանն ահա ամեն ինչ կառուցում է այդ փոխկապակցումների վրա և վարում մարդակենտրոն տնտեսական քաղաքականություն:

Որքան էլ այսօր երկրում առկա է տնտեսական ճգնաժամը, որքան էլ շատ են վայրիվերումները տարբեր ոլորտներում, գլխավոր տնօրենը կարողանում է դիմակայել բոլոր մարտահրավերներին և առաջ տանել իր թեզերն ու գաղափարները:

Արդյունքում, այսօր Հայաստանում ունենք հեռակապի ծառայությունների այնպիսի համակարգ, որը պատիվ կբերի ցանկացած երկրի: