«Օֆշորի» հայտնի սկանդալի դատավարությանը ներկա չէին ո'չ Սարգսյանը ու ո'չ էլ Կճոյանը

Orer.am-ը գրում է.

Այսօր` հուլիսի 9-ին, Էրեբունի եւ Նուբարաշեն վարչական շրջանների ընդհանուր իրավասության դատարանում տեղի ունեցավ «Օֆշորային» հայտնի սկանդալի առաջին դատական նիստը, որի ժամանակ ցուցմունք տվեց գործով տուժող ճանաչված գործարար Փայլակ Հայրապետյանը,- հայտնում  է Orer.am-ը։

«2009թ. որոշել էի զբաղվել ադամանդագործությամբ ու ոսկերչությամբ: Նույն թվականին, տեղեկանալով, որ ռուսական 500 մլն-անոց վարկի 100 մլն-ը լինելու է ադամանդի հումքի ձևով, ադամանդի արտադրություն հիմնելու, ադամանդագործության ուսումնական կենտրոն բացելու և 10 000 աշխատատեղ ստեղծելու ծրագիր մշակեցի ու ներկայացրեցի կառավարությանը:

Շատ չանցած, էկոնոմիկայի նախարարության Առևտրի և շուկաների կարգավորման վարչության պետ Գագիկ Քոչարյանը զանգահարեց ինձ ու հրավիրեց ադամանդագործների խորհրդակցության: Այդտեղ առաջին անգամ հանդիպել եմ այժմ ամբաստանյալ Աշոտ Սուքիասյանին: Մինչ այդ ես նրան չեմ ճանաչել»,- պատմեց Փ. Հայրապետյանը ու հավելեց. «Վերևում նստած էր նախարար Ներսես Երիցյանը, մի կողքին՝ Գագիկ Քոչարյանը, մյուս կողքին՝ Աշոտ Սուքիասյանը, որին այդ ժամանակ բոլորովին չէի ճանաչում, բոլորովին», նկատեց տուժողը:

Նա իր խոսքում նաեւ նշեց, որ այդ խորհրդակցության ժամանակ Գագիկ Քոչարյանը հայտնել է, թե ռուսական հումքը որակյալ չէ, և որոշվել է գնել Աշոտ Սուքիասյանին պատկանող, Աֆրիկայում գտնվող հանքերի հումքը: «20 օր հետո բերեց նմուշները փակ ծրարով, Քոչարյանը ծրարը բացեց, լցրեց սեղանին դրված թղթի վրա: Բոլորը հավանեցին, ես մասնագետ չեմ, բայց ասում էին, որ լավն է: Բոլորը անկեղծորեն ուրախացան, որ արդեն ապրանքը կա, նմուշը եկել է: Ես էլ սկսեցի վստահել իրեն, նույնիսկ սեղան գցեցի, նշեցինք էդ հաջողությունը»:

Նոր բիզնես ծրագիր սկսելու համար գումար էր հարկավոր, նշեց տուժողը. «Նոր գործի համար վարկ ստանալու նպատակով դիմել ենք «Արմսվիս» բանկ, սակայն հինգ օր հետո Աշոտ Սուքիասյանը զանգահարեց ու ասեց, որ բանկը չի կարողացել 12 միլիոն դոլլարի վարկ տալ: Նա նաեւ ասեց, որ ինքը հիմա վարչապետի հետ գտնվում է «Ամերիաբանկ»- ում: Ես, վստահելով Աշոտ Սուքիասյանին, լիազորագիր եմ տվել նրան: Նա էլ իրականացրել է բանկի հետ հետագա գործարքները՝ առանց ինձ»:

Ըստ տուժողի խոսքի, նա իր նոր ծանոթին այդչափ վստահել է, քանի որ նրանց հարաբերությունների մեջ կային ՀՀ վարչապետ Տիգրան Սարգսյանն ու Նավասարդ Կճոյանը: «Երբ որ տեսա ապրանքը չի գալիս, ասացի՝ Աշոտ ինչո՞ւ չի գալիս: Ասաց՝ տեխնիկան դեռ տեղ չի հասել, մինչև Հարավային Աֆրիկայից հասնի, երկու-երեք ամիս կանցնի: Ես զգացի այդ պահին, որ խաբված եմ, դրանից հետո հաճախ էի գնում նրանց տուն, թե ի՞նչ եղավ, ե՞րբ կլինի: Այդ ընթացքում մահացավ նրա հայրը, մեր հայկական սովորությունները գիտեք՝ թաղում, քառասունք, նա գնաց Աֆրիկա, եկավ, հետո մահացավ մայրը, եւ այդպես հասավ հունվար ամիսը», ասաց Փայլակ Հայրապետյանը:

Նա նաեւ վերհիշեց, որ իրենց ցանկացած հանդիպման ժամանակ ներկա է եղել Նավասարդ Արքեպիսկոպոս Կճոյանը, ում ներկայությունն էլ կաշկանդել է տուժողին խոսել գործից. «Ամեն անգամ հենց զանգում էի իրեն, թե գալիս եմ խոսենք, գնում էի իրենց տուն, տեսնում Կճոյանը այ, այստեղ նստած է,- ասաց Հայրապետյանը՝ մատնացույց անելով սեղանի կողմը,- առանց զանգելու էի գնում, 5 րոպե հետո Կճոյանը գալիս էր: Դե, էլ Կճոյանի ներկայությամբ ի՞նչ խոսեի»,- մանրամասնեց տուժողը:

Սոսե Չանդոյան