«Ինքնավստահությունս այնքան շատ է , որ հաճախ խանգարում է» (լուսանկարներ)

Լիլիթ Սարգսյանը վերջերս է հայտնվել հեռուստաեթերում. USArmenia-ի ուղիղ եթերում նա վարում է առավոտյան ծրագիրը։ Գեղեցիկ ու վառ արտաքինով երիտասարդ հաղորդավարուհին  շատերի մոտ է տպավորվում՝ թեպետ հեռուստաեթերում շատ պատահական է հայտնվել։

Wnews.am-ի դիմանկարային հարցազրույցների շարքում այս անգամ ներկայացնում ենք Լիլիթ Սարգսյանին.

 Ես

Ինքնավստահությունս այնքան շատ է, որ հաճախ խանգարում է: Տանել չեմ կարողանում դատարկ և անհավատ մարդկանց: Կարոտս է անսահման մեծ. հաղթահարելու շատ բաներ ունեմ….

Իմ հայտնվելը հեռուստատեսությունում

Մի անգամ մի կին, ով աշխատում է TV-ում, ինձ դրսում տեսնելով, ասաց, որ շատ է ցանկանում, որպեսզի ես աշխատեմ հեռուստատեսությունում, որովհետև տարբերվող արտաքին ունեմ: Հեռախոսահամարս վերցնելուց հետո, նա կապ է հաստատում TV-ի հետ և այսպես ինձ այնտեղից կանչում են: Առաջին հարցազրույցից հետո ես միանգամից հայտնվեցի USArmenia-ի եթերում: Մեկուկես շաբաթից հետո սկսեցի արդեն ուղիղ եթեր վարել: Շատ հայտնի մարդիկ են եղել հյուրերս: Ինձ համար անակնկալ էր, որ ես պիտի վարեի նաև մեծ համերգային ծրագիր. պատկերացրեք առաջին անգամ բեմում, և դու պիտի հանդես գաս 5 հազարանոց դահլիճի առջեւ, որը և’ բարդ էր, և’ պատասխանատու: Դրանից հետո բոլոր վախերս՝ կապված հրապարակայնորեն հանդես գալու հետ, վերացան: Չնայած այն հանգամանքին, որ հաղորդավարությունը բացարձակապես կապ չունի իմ մասնագիտության հետ, ես հիմա այդ աշխատանքն եմ անում, որովհետև սկսել եմ այս ամենը շատ սիրել և ինձ ուժ են հաղորդում նաև մարդիկ, ովքեր կատարածս աշխատանքը գնահատում են իրենց խոսքերով:

Առաջին եթերս

Երբ պիտի եթեր դուրս գայի, ես զանգահարեցի հարազատ մորաքրոջս, ով ինձ համար այս մասնագիտության հարցում առաջին օրինակելի մարդն է. հարազատ մորաքույրս հաղորդավարուհի Նանե Արզումանյանն է, երկար պատմելուցս հետո, որ վախենում եմ և այլն, ընդամենը նրա արած մի արտահայտությունը լրիվ բավական էր, որ հանգիստ մտնեի եթեր՝ «Լիլիթ, դու խաբել չգիտես, նշանակում է՝ տեսախցիկը սիրելու է քեզ, դու կարող ես»: Առաջին եթերս շատ վատ էր ու անսպասելի: Ես շնորհակալ եմ նաև իմ գործընկերոջը՝ Ռաֆաելին, ով համբերատար էր իմ հարցում: Անդադար կրկնում էի, որ կադրերը հանեին, որովհետև բաներ կային, որոնք չէի հավանում: Իսկ առաջին ուղիղ եթերս ամենաջերմ հիշողություններն է արթնացնում, որովհետև վախից և լարվածությունից անդադար ծիծաղում էի։

Գեղեցկությունն ու կարիերան

Ես կարծում եմ, որ հրաշալի է, եթե աղջկա արտաքինը խոսուն է լինում: Երբ աղջիկը տարբերվող արտաքին է ունենում, բոլորը մտածում են, որ դա բավական է առաջ գնալու համար: Հիմա ամեն բան փոխված է ՝ ի ուրախություն շատ խիզախ մտածելակերպ ունեցող աղջիկների, որովհետև միայն գեղեցիկ լինելով՝ չես կարող հայտնվել ուղիղ եթերում, երբ ասելիք չունես: Խորը բովանդակային առանցքներ ունեցող հարցեր կան, որոնք սիրուն հայացքով չես կարող շրջանցել, մարդիկ նայում ու հետևում են խոսքիդ: Երբ աղջիկն իր գեղեցկությունդը օգտագործում է խոսքի դիպուկությամբ, սա ապահովում է ցանկացած կարիերայի մեծ հաջողությունը:

Կյանքը Լոս Անջելեսում

Սա մի հարց է, որ հուզմունքս չեմ կարողանում թաքցնել: Լոնդոնում երկու տարի մնալուց հետո, վերադարձա Հայաստան և որոշում կայացրեցի գալ Ամերիկա: Միայնակ եկել եմ այստեղ և առանց որևէ մեկի օգնության՝ այսօր հասել եմ որոշակի բաների: Կային սարսափելի վատ օրեր, որ ես այլևս չէի կարողանում մնալ այտեղ, երբ արթնանում էի և ցանկանում ուղղակի հետ կանգնել այստեղ մնալու մտքից, բայց շնորհիվ ծնողներիս և մորաքրոջս քաջալերման՝  մնացի և պայքարեցի:

Անձնական կյանքս

Անձնական…Չեմ ցանկանա շրջանցել: Ես լրիվ ուրիշ մարդ եմ դառնում՝ բնավորությունս այնքան է փոխվում, որ չեմ կարողանում դիմացինիս հասկանալ. հատկապես երբ դիմացինս ինձ նման ինքնավստահ է և ինքնասածի: Կար մարդ, ով մեծ նշանակություն ունի իմ կյանքում, չգիտեմ ինչպես կդասավորվեն մեր հարաբերությունները, բայց ես շատ կուզեի, որ անձնական կյանքի բնավորությունս փոխվեր. այն ինձ խանգարում է լիակատար երջանկություն ճաշակել:

Նպատակներս

Նպատակներս կապված չեն հեռուստատեսության բնագավառի հետ: Մասնագիտությունս ընտրել եմ բիզնես և մենեջմենթ, իսկ հիմա ուզում եմ շարունակել փաստաբանի մասնագիտությամբ: Շատերն են այս խորհուրդը տվել,որովհետև բարդ բնավորություն ունեմ. անդադար կառչում եմ բառերից, երևի կօգնի այդ մասնագիտության մեջ՝ հետևելով բառերի ճշգրտության։