Հայաստան-Շվեյցարիա (Մ20). Խաղից առաջ

Tert.am-ը գրում է .

Հայաստան - Շվեյցարիա (Մ20)
հուլիսի 9, Հունգարիա, Սեկեշֆեխերվար, ժ. 15:30
Եվրոպայի մինչեւ 20 տարեկանների առաջնություն, Բ դիվիզիոն

Այսօր բասկետբոլի Հայաստանի մինչեւ 20 տարեկանների հավաքականը կսկսի ելույթները Եվրոպայի Բ դիվիզիոնի առաջնությունում: Հայկական բասկետբոլի համար սա բավականին լուրջ իրադարձություն է, քանի որ անկախությունից հետո Հայաստանն առաջին անգամ է մասնակցելու նման խոշոր մրցաշարի:

Սա նաեւ մեծ իրադարձություն է ամբողջ հայկական սպորտի համար, քանի որ թիմային մարզաձեւերում Հայաստանը միայն ֆուտբոլում է կանոնավոր կերպով մասնակցում նմանատիպ առաջնությունների:

Լեգիոներներ Ռուսաստանից եւ ԱՄՆ-ից

Հայաստանի հավաքականի հայտացուցակում են 12 բասկետբոլիստներ: Նրանցից 11-ը ներկայացնում են արտասահմանյան ակումբներ (8-ը Ռուսաստան, 3-ը ԱՄՆ): Լեգիոներների նման առատությունը փաստում է, որ Հայաստանը պարզապես մասնակցելու համար չի մեկնել Հունգարիա եւ առաջնության մեկնարկից առաջ կատարվել է մասնակիցների լուրջ ընտրություն:

Հայաստանի ներկայիս կազմի 5 խաղացողներ 2011 թվականին մասնակցել են Եվրոպայի մինչեւ 16 տարեկանների Բ դիվիզիոնի առաջնությանը: Այդ տարի Հայաստանը 23 հավաքականների շարքում գրավեց 6-րդ տեղը:

Մարզիչը

Հայաստանի երիտասարդական հավաքականը մարզում է ռուս փորձառու մասնագետ Վիկտոր Ուսկովը: Վերջինս 61 տարեկան է: 3 տարեկանից բնակվել է Էջմիածինում, իսկ ԽՍՀՄ փլուզումից հետո մեկնել է Ռուսաստան: Ուսկովին օգնում է նրա որդին՝ Վիկտոր Ուսկով կրտսերը, ով վերջին տարիներին խաղացել է մի քանի ռուսական ակումբներում:

Մրցակիցը

Շվեյցարիան կանոնավոր կերպով մասնակցում է Եվրոպայի տարբեր տարիքային առաջնությունների եւ այս թիմի խաղացողները միջազգային լավ փորձ են կուտակել: Վերջին տարիներին Շվեյցարիայի կազմում սկսել են հանդես գալ նաեւ այլազգիներ, ովքեր հիմնականում բալկանյան երկրներից են:

B դիվիզիոն

Եվրոպան ունի 3 դիվիզիոն՝ A, B եւ C: A ում հանդես են գալիս ուժեղագույն 16 հավաքականները, իսկ մնացածները հիմնականում հանդես են գալիս B  եւ C-ում: B-ում այս տարի հանդես կգան 18 հավաքականներ:

Հայաստանը հայտնվել է B դիվիզիոնի 3-րդ ենթախմբում, որտեղ փլեյ-օֆֆի ուղեգրի համար պայքարելու է Շվեյցարիայի, Բելառուսի եւ Մակեդոնիայի հավաքականների հետ: Խմբերում ցածր հորիզոնականներ զբաղեցրած հավաքականները հետագայում պայքարելու են 9-ից 18-րդ տեղերի համար: