Ռուսաստանի «իսկանդերային» մարտավարություն Հարավային Կովկասում. թյուրքա-ադրբեջանցիների սարսափը

Fact.am-ը գրում է.

Ադրբեջանի իշխանությունները չեն մեկնաբանում Երևանի և Մոսկվայի միջև 200 մլն դոլարի նոր զինատեսակներ (այդ թվում «Իսկանդեր-Մ» օպերատիվ-մարտավարական հրթիռային համակարգեր) մատակարարելու պայմանավորվածությունը: Միայն Ադրբեջանի ԱԳՆ մամլո ծառայության ղեկավար Հիկմետ Գաջիևն է խոսել այդ մասին: Նրա խոսքերով՝ Բաքուն «վճռականորեն» ասել է, որ Երևանին մատակարարվող զենքը չպետք է տեղակայվի Արցախում: Գաջիևի խոսքերով այդ հարցն այս պահին ուսումնասիրվում է:

Պետք է նկատել, որ այս հայտարարությունն ուղղակի ոչինչ չասող բարբաջանք է, քանի որ «Իսկանդեր-Մ» համակարգի շատ ավելի հեռահար է, քան միայն ղարաբաղյան շփման գիծը: Մասնավորապես նշենք, որ «Իսկանդեր-Մ»-ներից սարսափում է անգամ ՆԱՏՕ-ն, իսկ Կալինինգրադում նման համակարգերի տեղակայումը Արևելյան Եվրոպայի երկրները համարում են սեփական խոցելիության խորհրդանիշ: Նույնն է պատկերը նաև մեր տարածաշրջանում:

Պարզաբանենք. Ռուսաստանը այլ երկրների վաճառում է «Իսկանդեր-Է» համակարգեր, որի գործունեության շառավիղը 280 կմ է: Իսկ «Իսկանդեր-Մ»-ը ՌԴ բանակի համար է, դրա գործունեության շառավիղը 500 կմ է. Հայաստանը կարող է ստանալ հենց այդ համակարգերից: Երևանից մինչև Բաքու հեռավորությունը 500 կմ չի կազմում, այսինքն Ադրբեջանի ողջ տարածքը հայտնվում է հայկական հրթիռների հասանելիության տարածքում:

Դրանից բացի նշենք, որ Ռ-500 տեսակի թևավոր հրիթիռների կիրառության դեպքում «Իսկանդեր-Մ»-ի գործունեության շառավիղը կկազմի 2000 կմ, այսինքն կընդգրկի գրեթե ողջ Մերձավոր Արևելքը, այդ թվում Թուրքիայի տարածքն ամբողջությամբ:

Այնուհանդերձ հասկանալի է, որ այս համակարգերի մատակարարումը Հայաստանին ավելի շուտ նպատակամղած է տարածաշրջանում ստատուս քվոյի պահպանությանն ու ռուսական ազդեցության պահպանմանը: