Վրաստանի ու ԵՄ-ի միջեւ անվիզա ռեժիմի մասին համաձայնագրի ստորագրման արարողությունը կկայանա մարտի 1-ին

Վրաստանի ու ԵՄ երկրների միջեւ անվիզա ռեժիմի մասին համաձայնագրի ստորագրման արարողությունը կկայանա Բրյուսելում 2017-ի մարտի 1-ին, հայտնում է «Ազատություն» ռադիոկայանը։

«Վրաստանի համար անվիզա ռեժիմի ու անվիզա ռեժիմի ժամանակավոր դադարեցման մեխանիզմի մասին համաձայնագիրը կստորագրվի մարտի 1-ին Բրյուսելում»,- հայտնում է ռադիոկայանը։

2016-ի մարտի 9-ին ԵՀ-ն Եվրախորհրդարանին ու ԵՄ խորհրդին է ներկայացրել օրենսդրական առաջարկ՝ Վրաստանի, ապրիլի 20-ին՝ Ուկրաինայի, իսկ մայիսի 4-ին՝ Թուրքիայի ո ւ Կոսովոյի համար վիզային ռեժիմի ազատականացման մասին։Սկզբում ենթադրվում էր, որ Ուկրաինայի ու Վրաստանի համար անվիզա ռեժիմները կքննվեն նույն փաթեթով, սակայն եվրապատգամավորները առաջարկել են առանձնացնել երկրները։

Դեկտեմբերին 8-ին ԵՄ երկրների մշտական ներկայացուցիչների կոմիտեն ԵՄ Խորհրդի անունից հաստատել էր անվիզա ռեժիմի դադարեցման մասին փոխզիջումային տեքստը, որը համաձայնեցված էր Եվրոպական խորհրդարանի հետ։ Ըստ նախագծի՝ ԵՀ-ն կկարողանա ամեն պահ որոշում կայացնել ցանկացած երկրի քաղաքացիների համար անվիզա ռեժիմի դադարեցման մասին։

Դեկտեմբերի 20-ին ԵՄ անդամները հավանություն էին տվել Վրաստանի հետ անվիզա ռեժիմին։ Եվրախորհրդարանի քաղաքացիական ազատությունների կոմիտեն հունվարի 12-ին է հավանություն է տվել Վրաստանի համար անվիզա ռեժիմի ազատականացմանը։