Արցախում մահացած զինծառայողին հուղարկավորել են զինվորական կարգով

Մայիսի 8-ին ԼՂՀ ՊԲ զորամասերից մեկի պահպանության տեղամասում մահացած ժամկետային զինծառայող Հարություն Համբարյանին, այսօր` մայիսի 11-ին, զինվորական կարգով հուղարկավորել են Լոռու մարզի Արևաշող գյուղի գերեզմանատանը: Այս մասին NEWS.am-ի հետ զրույցում հայտնեց Արևաշողի գյուղապետ Պերճ Պապիկյանը՝ նշելով, որ Հարություն Համբարյանի հուղարկավորությանը ՀՀ Պաշտպանության նախարարությունից ներկայացուցիչներ չեն եղել. «Իր ծառայակից ընկերներն էին ներկա, հրամանատարները, Լոռու մարզպետը, տեղակալները, նրա ազգական՝ ՀՀ փոխոստիկանապետ Անուբաղ Համբարյանը: Ամբողջ գյուղը սգում էր նրա մահը, ոչ մեկս էլ չենք հավատում, որ նա այլևս չկա»:

Հարություն Համբարյանի հարազատներից Հայկուհի Պետրոսյանը մեզ հետ զրույցում նշեց, որ Հարությունը տան միակ արու զավակն է, ուներ իրենից մեծ 3 քույր. «Մի քույրն էլ բժշկուհի է, իրեն շատ էին սիրում քույրերը: Շատ լավ ընտանիք էին և շատ լավ էլ ապրում էին: Հարությունը սովորում էր ԵՊՀ-ում, 1 կուրսի ուսանող էր»,-ասաց նա:

Նշենք, որ Քննչական կոմիտեն դեպքի առթիվ մայիսի 8-ին քրեական գործ է հարուցել ՀՀ քրեական օրենսգրքի 110-րդ հոդվածի 1-ին մասով՝ ինքնասպանության հասցնելու հատկանիշներով: Նույն օրը կատարվել է դեպքի վայրի զննություն, Հարություն Համբարյանի դիակի արտաքին զննություն, նշանակվել է դիակի դատաբժշկական փորձաքննություն:

Ավելի վաղ ԼՂՀ ՊԲ մամուլի ծառայությունը հայտնել էր, որ մայիսի 8-ին` ժամը 15:10-ին, ՊԲ հյուսիսարեւելյան ուղղությամբ տեղակայված զորամասերից մեկի պահպանության տեղամասում մարտական հերթապահության կրման ժամանակ մահացու հրազենային վիրավորում է ստացել զինծառայող, 1995թ. ծնված Հարություն Հրայրի Ղամբարյանը: Դեպքի մանրամասները պարզելու համար կատարվում է քննություն: