ՀՀԿ-ն «ինքնամաքրվում է»

Եվ այսպես ՀՀԿ համամասնական ցուցակը գլխավորելու է Պաշտպանության նախարար Վիգեն Սարգսյանը, Սերժ Սարգսյանը գլխավորելու է ՀՀԿ նախընտրական շտաբը։ Ըստ էության նման զարգացումը բավական սպասելի էր, քանի որ նայելով Հանրապետական հրապարակած համամասնական ցուցակին, պետք է արձանագրենք, որ ՀՀԿ-ին բավական ծանր ընտրություններ են սպասվում մի շարք առումներով։ Նախ ցուցակի առաջին տասնյակում են Վիգեն Սարգսյանը, Շարմազանովը, Աշոտյանը, Արմեն Ամիրյանը Արփինե Հովհաննիսյանը և այլն, այսինքն այլ կերպ ասած հանրապետականի ինտելեկտուալները։

Վերջիններս ընտրական գործընթացների գործնական փորձ ըստ էության չունեն, առավել ևս ընտրակեղծիքների ու ընտրախախտումների, նրանց փորձը սահմանափակված է եղել այդ կեղծիքների դեմ քարոզչությամբ՝ կարճ ասած նրանք ապահովել են միայն գործընթացի տեսական մասը, ուստի  պրակտիկ առումով ընտրական գործընթացներին կուսակցության ինտելեկտուալները մեծ օգուտ չեն կարող տալ։ Մյուս կողմից ՀՀԿ ցուցակի ներկայիս անունները տպավորություն են ստեղծում, թէ հանրապետականը փորձում է ինքնամաքրվել՝ առաջ բերելով երիտասարդ ինտելեկտուալների, հանրությանը քիչ հայտնի որոշ գործիչների  (օր․Արա Բաբլոյան) և խորհրդային նոմենկլատուրային մտավորականի դասական կերպարների  (Արմեն Ամիրյան)։

Առաջին հայացքից այս ինքնամաքրումը սակայն լիովին այլ պատկեր կստանա ռեյտինգային թեկնածուների պարագայում, որոնցից ոմանց անուններն արդեն հայտնի են ր այս անունների շարքում ընդգրկված են և նախկին չինովնիկներ, և ներկա պատգամավորներ, և գործարարներ և բնականաբար մականունավորներ՝ սկսած Առաքել Մովսիսյանից վերջացրած Ալիկ Սարգսյանով։

Ահա հենց այս անձինք են լինելու հանրապետականի իրական դեմքը, որը սակայն թաքնված է լինելու համամասնական ցուցակի ներքո։

Ամենայն հավանականությամբ, հանրապետականի համասնական ցուցակի շարունակության մեջ մենք կտեսնենք այսպես կոչված տեխնոկրատ գործիչներին, որոնք բնականաբար արդեն Կարեն Կարապետյանի կառավարության հենարանը կլինեն և բնականաբար կհավասարկշռեն հին գվարդիային բնականաբար ապահովելով բալանսավորման լծակների գտնվելը Սերժ Սարգսյանի ձեռքում։

Սա թերևս այն մոտավոր մեխանիզմն է, որը գծագրվել է Հանրապետականի վերնախավում, սակայն այդուհանդերձ պետք է նշել, որ քաղաքական ներկա իրավիճակը բավական հեղհեղուկ է և չեն բացառվում նաև տարատեսակ ֆորս մաժորային իրավիճակները։

Աղասի Մարգարյան

PressMedia.am վերլուծաբան