Պայքարի դուրս եկած էքստրիմի սիրահար քաղաքացիները` Ազատության հրապարակում (լուսանկարներ)

Orer.am-ը գրում է.

Ազատության հրապարակը, որը երեկոյան ժամերին սովորաբար մարդաշատ է լինում, ցերեկվա ժամերին խաղաղ է ու հանգիստ: Արեւի ճառագայթները կարծես թե անում են իրենց գործը: Միայն երեկոյան ժամերին է, որ երեխաների խինդն ու ծիծաղը փոխարինվում է հարյուրավոր ցուցարարների կոչերով եւ պահանջներով:

Իսկ ինչ վերաբերում է բուն ցույցի նպատակին, ապա, ինչպես արդենտեղեկացրել էինք, երեկ հրապարակի ամբիոնից խոսվեց այն մասին, որ նախաձեռնող խմբի անդամները մտադիր են ստեղծել կամ հասարակական կազմակերպություն կամ կուսակցություն, որի պահանջը լինելու է հստակ` ուղղված դեպի գործող իշխանությունները:

Իսկ պայքարի դուրս եկած Դավիթ Սանասարյանն էլ, ով Երեւանի ավագանու «Բարեւ Երեւան» խմբակցության անդամ է, շարունակում է իր հացադուլը` հուսալով, որ իր այդ քայլը խթան կհանդիսանա ՀՀ քաղաքացիների համար՝ Ազատության հրապարակում հավաքվելու:

Ըստ Դավիթ Սանասարյանի՝ հացադուլի իրականացումը ինքնանպատակ չէ. «Ես իմ կողմից հայտարարված հացադուլը հերոսություն չեմ համարում: Երբ լինի մոբիլիզացիա, ես, բնականաբար, կդադարեցնեմ հացադուլս»:

Տեղեկացնենք, որ բացի Դավիթ Սանասարյանի կողմից իրականացվող քայլերից՝ տեղի են ունենում այլ, արդեն զավեշտալի գործողություններ:

Էլեկտրաէներգիայի թանկացման դեմ պայքարող ակտիվիստներից մեկն այսօր, ի նշան բողոքի, կարել էր բերանը։ Ոստիկանների և ցուցարարների հորդորով 28-ամյա երիտասարդը տեղափոխվել էր հիվանդանոց, որտեղ քանդել էին կարերը։

Թեպետ օր օրի մեկը մյուսից էքստրեմալ քայլերն այդքան էլ հասկանալի չեն, բայց, այնուամենայնիվ, հույս ունենանք, որ պայքարի դուրս եկած քաղաքացիներն այսուհետ չեն վնասի ո՛չ իրենց, եւ ո՛չ էլ իրենց առողջությունը:

Հիշեցնենք, որ Ազատության հրապարակում բողոքի ակցիաները քաղաքապետարանի կողմից արտոնված չեն, սակայն ոստիկանները տարածքն ազատելու կոչով հանդես չեն եկել։ Ցուցարարների՝ Բաղրամյան պողոտայից բերված գույքն էլ տեղադրված է աստիճանահարթակին…

Սոսե Չանդոյան