Կրակոցներ Դիլիջանում. տղերքը ժամադրվել էին հարցեր պարզելու համար. առաջադրվել են մեղադրանքներ

ՀՀ քննչական կոմիտեի ՀԿԳ քննության գլխավոր վարչությունում քննվող քրեական գործով ձեռնարկված քննչական գործողությունների արդյունքում բացահայտվել են 2016թ. փետրվարին Դիլիջան քաղաքում տեղի ունեցած զինված միջադեպի՝ էական նշանակություն ունեցող մի շարք հանգամանքեր:

ՀՀ Քննչական կոմիտեից NEWS.am-ին հայտնում են, որ 2016թ. փետրվարի 11-ին ահազանգ էր ստացվել, որ Դիլիջան քաղաքի Թբիլիսյան խճուղում հնչել են կրակոցներ, որոնց հետեւանքով 1989թ. ծնված Ս.Միքայելյանը հրազենային վնասվածքով տեղափոխվել է բժշկական կենտրոն։ 

Սպանության փորձի դեպքի առթիվ հարուցվել է քրեական գործ, որով նախաքննությունն իրականացվել է ՀՀ ՔԿ ՀԿԳ քննության գլխավոր վարչության վարույթում։  Ձեռնարկված քննչական մեծածավալ գործողությունների արդյունքում բացահայտվել են էական նշանակություն ունեցող մի շարք հանգամանքներ, այդ թվում՝ միջադեպին մասնակից անձանց շրջանակը, անհատականացվել նրանց գործողությունները, պարզվել վիճաբանության շարժառիթը։ 

Մասնավորապես ՝փաստական տվյալներ են ձեռք բերվել առ այն, որ Դիլիջան քաղաքի երկու բնակիչներ՝ Դ.Հակոբյանը եւ Ս.Միքայելյանը, դեպքից օրեր առաջ՝ փետրվարի 9-ին, կենցաղային հարցերի շուրջ վիճաբանել են Դիլիջան քաղաքում գործող ավտոլվացման կետի մոտ։  Չպարզաբանված հարցերի շուրջ զրուցելու համար կողմերը նախնական պայմանավորվել են հանդիպել փետրվարի 11-ին՝ առանց հստակեցնելու ժամը եւ հանդիպման վայրը։

Նախնական քննության տվյալներով՝ դեպքի օրը Ս.Միքայելյանն իր անձնական ավտոմեքենայով, որի ղեկին գտնվել է ընկերը,  մի քանի անգամ գնացել է Դ.Հակոբյանի բնակության վայր՝ Շամախյան թաղամաս։ Հերթական այցը տեղի է ունեցել ժամը 22-ի սահմաններում, որտեղից վերադառնալիս  Դ.Հակոբյանի կողմից կրակոցներ են արձակվել Ս.Միքայելյանի ավտոմեքենայի ուղղությամբ, որոնք դիպել են ավտոմեքենայի տարբեր մասերին։ Միջադեպի հետեւանքով Ս.Միքայելյանն ստացել է տարբեր վնասվածքներ՝ աջ սրունքի վերին երրորդականի հրազենային գնդակային վիրավորման, ազդրի, ծնկահոդի եւ սրունքի շրջանի բազմաթիվ սալջարդ վերքերի ձեւով:

Քննությամբ բավարար ապացույցներ են ձեռք բերվել, որ ինքնաձիգ եւ մարտական փամփուշտներ են եղել  նաեւ Ս.Միքայելյանի ավտոմեքենայում, ով իր ավտոմեքենայի ուղղությամբ արձակված կրակոցներից հետո ինքնաձիգից կրակոցներ է արձակել օդ՝ վախեցնելու նպատակով եւ դիմել փախուստի:

Ձեռք բերված ապացույցների հիման վրա՝ Դ.Հակոբյանին մեղադրանք է առաջադրվել՝ ՀՀ քրեական օրենսգրքի 34-104-րդ հոդվածի 2-րդ մասի 6-րդ կետով եւ 235-րդ հոդվածի 1-ին մասով:

Առանձին քրեական գործ է հարուցվել նաեւ՝ Ս.Միքայելյանի կողմից ապօրինի զենք եւ ռազմամթերք ձեռք բերելու եւ պահելու համար, եւ տվյալ քրեական գործի շրջանակներում մեղադրանք է առաջադրվել նաեւ նրան՝ ՀՀ քրեական օրենսգրքի 235-րդ հոդվածի 1-ին մասով: 

Երկու քրեական գործերով նախաքննությունն ավարտվել է եւ մեղադրական եզրակացությամբ ուղարկվել նախաքննության օրինականության նկատմամբ հսկողություն իրականացնող դատախազին: