«Պուտինը ձգտում է պառակտել Եվրոպան». Կարլ Բիլդտ

GalaTV.am-ը գրում է.

Շվեդիայի նախկին ԱԳ նախարար, ներկայումս Ուկրաինայի նախագահ Պետրո Պորոշենկոյի խորհրդական Կարլ Բիլդտը գերմանական Bild հանդեսին տված հարցազրույցում հայտնել է, որ 2014թ.-ի ամռանը «Նովոռոսիային» պարտությունից փրկել է Ռուսաստանը՝ այնտեղ ուղարկելով բանակային ստորաբաժանումներ:

«Անցած տարվա օգոստոսին Ուկրաինայի արեւելքում այնպիսի իրավիճակ էր, որ «Նովոռոսիայի» ամբողջ ծրագիրը ձախողման եզրին էր: Ուկրաինական բանակն ի վիճակի էր հաղթելու: Մինչ այդ ռուսները սահմանափակվել էին՝ ուղարկելով սակավաթիվ զինվորականներ եւ զինամթերք: Սակայն օգոստոսին Ուկրաինա մտան կանոնավոր զորամիավորումները, մտան եւ հաղթեցին: Ռուսաստանցիների իրական թիվը հայտնի չէ, սակայն հնարավոր է, որ տարածաշրջանում նրանց թիվը կազմում է 9 հազար» ,- հայտարարել է Բիլդտը:

Ըստ դիվանագետի՝ Ուկրաինայի արեւելքում գտնվող ռուսաստանցի զինվորականների նպատակն անջատողականներին մարտական պատրաստվածություն ուսուցանելն է: «Բացի դրանից, նրանք տրամադրում են հրետանի, զինում ռազմական այլ տեխնիկայով: Առանց ռուսաստանյան բանակի օգնության ոչինչ չէր ստացվի,- ավելացրել է Բիլդտը: -Այս ամենի հետ մեկտեղ սահմանի մյուս կողմում գտնվում են կանոնավոր զորամիավորումներ, որոնք պատրաստ են մուտք գործել Ուկրաինայի տարածք անհրաժեշտության դեպքում»:

Խոսելով նպատակների մասին, որոնք Ուկրաինայում հետապնդում է Ռուսաստանը, Բիլդն ասել է` «հիմա արդեն ակնհայտ է, որ պարոն Պուտինն ուզում է  ապակայունացնել երկիրը»: «Ես չեմ կարող ասել՝ ունի նա արդյոք նպատակ առաջ շարժվելու: Բայց ես կարծում եմ, որ նա ցանկանում է ապակայունացնել Ուկրաինան եւ պառակտել Եվրոպան, Արեւմուտքը»,- ասել է Բիլդտը:

Միեւնույն ժամանակ Շվեդիայի նախկին ԱԳ նախարարը դեմ է արտահայտվել Ուկրաինայի տարածք զենքի տեղափոխմանը: «Ես կարծում եմ, որ ուսուցումն ամենակարեւորն է ուկրաինական բանակի մարտունակության մակարդակը բարձրացնելու համար,- նշել է նա: