Թաթուլ Կրպեյանի կիսանդրու տեղադրում, հուշատախտակների փակցնում, փողոցի վերանվանում. Երևանի ավագանու առաջիկա նիստի օրակարգը

Հասարակություն 10 Փետրվար, 2017 17:09

Հաստատվել է Երևան քաղաքի ավագանու փետրվարի 14–ին կայանալիք ավագանու նիստի օրակարգի նախագիծը: Ինչպես տեղեկանում ենք Երևանի քաղաքապետարանի պաշտոնական կայքից՝ մյուս շաբաթ կայանալիք ավագանու նիստի օրակարգում ներառված են փողոց անվանակոչելու, կիսանդրի ու հուշատախտակ փակցնելու նախագծեր:

Մասնավորապես, նախատեսվում է Երևան քաղաքի ՀՀ ազգային հերոս Թաթուլ Կրպեյանի անվան զբոսայգում տեղադրել հերոսի կիսանդրին։ Սրա վերաբերյալ միջնորդություններ են ներկայացվել Երևան քաղաքի գլխավոր ճարտարապետ Տիգրան Բարսեղյանի և Թաթուլ Կրպեյանի ընտանիքի կողմից։ Ըստ նախագծի՝ քանդակագործ Լևոն Թոքմաջյանի և ճարտարապետ Գ. Բաբաջանյանի կողմից հեղինակած Թաթուլ Կրպեյանի կիսանդրին Երևանի քաղաքապետին կից գեղարվեստի հանձնաժողովի կողմից հավանության է արժանացել։

Սրանից բացի, հիշատակ հավերժացնող երկու հուշատախտակ կփակցվի Երևանի Դ. Դեմիրճյան փողոցի հ. 38 և Սայաթ–Նովայի պողոտա հ. 33 հասցեներում՝ համապատասխանաբար պրոֆեսոր Արփենիկ Մարկոսյանցի և ՀԽՍՀ վաստակավոր երկրաբան, պետական, հասարակական գորրծիչ Սաբիր Ստեփանյանի հիշատակին:

Նշենք, որ պրոֆեսոր Արփենիկ Մարկոսյանցի հիշատակը հավերժացնող հուշատախտակը փակցնելու վերաբերյալ միջնորդություն է ներկայացվել Երևանի Վ. Բրյուսովի անվան պետական լեզվաբանական համալսարանի ռեկտոր Գ. Գասպարյանի կողմից, իսկ երկրաբան Սաբիր Ստեփանյանի հիշատակը հավերժացնող հուշատախտակը փակցնելու համար՝ ՀՀ քաղաքացի Թ. Ստեփանյանի կողմից։

Սրանից բացի, փետրվարի 14–ին կայանալիք ավագանու նիստի օրակարգ է ներառվել նաև Շենգավիթ վարչական շրջանի Ն. Շենգավիթի 9–րդ փողոցը հասարակական, քաղաքական գործիչ Շահամիր Շահամիրյանի անվամբ անվանակոչելու վերաբերյալ նախագիծը։ Այս մասին առաջարկություն է արվել Շենգավիթ վարչական շրջանի ղեկավարի, ինչպես նաև վարչական շրջանի Ն. Շենգավիթի 9–րդ փողոցի բնակչության կողմից: Շահամիր Շահամիրյանը 1771 թ. Մադրաս քաղաքում հիմնել է հայկական տպարան։ 1772 թ. այդ տպարանում լույս է տեսել Մովսես Բաղրամյանի «Նոր տետրակ, որ կոչի Յորդորակ» գիրքը: Հայ իրականության մեջ դա առաջին հրապարակախոսական տպագիր աշխատությունն էր:

Հիշեցնենք, որ շաբաթներ առաջ Երևանի ավագանու «Բարև Երևան» խմբակցության անդամ Անահիտ Բախշյանը քաղաքապետ Տարոն Մարգարյանին էր ներկայացրել մի որոշման նախագիծ, որով առաջարկում էր Երևանի Լենինգրադյան փողոցն անվանափոխել «Անկախության բանակի» հրամանատար, ֆիզիկոս Լեոնիդ Ազգալդյանի անվամբ: Տիկին Բախշյանը այս հարցի հետ կապված «Փաստի» հետ զրույցում նշել էր, որ սրա հետ կապված բոլոր հարցերի պատասխանները կլինեն այն ժամանակ, երբ ստացվի Երևանի ավագանու փետրվարի 14–ի նիստի օրակարգի նախագիծը: Այսօր այն արդեն կա, սակայն Լենինգրադյան փողոցը Ազգալդյանի վերանվանելու հետ կապված նախագիծ չկա: Հավանաբար, Անահիտ Բախշյանի նախագիծը հավանության չի արժանացել:

ՔՐԻՍՏԻՆԱՏԵՐ–ՄԱԹԵՎՈՍՅԱՆ