ՀՀ–Բելառուս հարաբերությունները չպետք է խզվեն.Բաքուն ցանկանում է «մեկուսացնել» Երևանին

Արտիոմ Բալասանովը  իր ֆեյսբուքյան էջում գրում է.

Հայտնի բլոգեր Ալեքսանդր Լապշինը Բելառուսից արտահանձնվել է Ադրբեջան ու այս պահին Բաքվում սպասում է իր դատավճռին։ Լապշինի ճակատագիրը հավանաբար որոշվելու է Իսրայել–ՌԴ–Ադրբեջան եռանկյունում, քանի որ Լապշինը Իսրայելի ու ՌԴ–ի քաղաքացի է, իսկ Մոսկվան ու Թել–Ավիվը հսկայական ազդեցության լծակներ ունեն Բաքվի վրա։ Հասկանալի է, որ Ադրբեջանի պես պետությունում անկախ դատարան և արդարատության անաչառություն ակնկալելը միամտություն կլինի`Լապշինի ճակատագիրը կախված է մեկ մարդու`Իլհամ Ալիևի քմահաճույքից`թե ինչ նրան կառաջարկեն Մոսկվան ու Թել–Ավիվի Լապշինի գործի վրա «աչք փակելու» դիմաց։

ՌԴ–ը և Իսրայելը ռազմա–տեխնիկական գլխավոր գործընկերներից են Ադրբեջանի համար`Մոսկվան Մինսկի խմբի շրջանակներում ներգրավված է ղարաբաղյան գործընթացում, ՌԴ–Ադրբեջան տնտեսական մեծ փաթեթ կա կյանքի կոչելու`ՌԴ–Ադրբեջան–Իրան երկաթգիծ և այլն, Բաքու–Նովոռոսիյսկ նավթամուղ, միլիոնավոր ադրբեջանցի միգրանտներ ՌԴ–ում և այլն։ Իսրայելն էլ ադրբեջանական նավթի սպառողներից է ու նորագույն զենքերի մատակարարը Ալիևի ռեժիմին։ Ազդեցության լծակներն առկա են`մնում է Ալիևը «ենթարկվի» այդ լծակներին և չփորձի ցուցադրական, «մյուսների աչքը վախեցնելու» համար իրական մեծ պատժաչափ սահմանել բլոգերի համար։

Ինչ վերաբերվում է Բելառուսին, ապա պետք է հաշվի առնել Մինսկի ու Բաքվի խորը տնտեսական կապերն ու Լուկաշենկոյի ցանկությունը պահպանել լավ հարաբերությունները Ալիև ընտանիքի հետ։ 
Բելառուսն Ադրբեջան է արտահանում մեքենաշինական արտադրանք, դեղորայք, սննդամթերք և այլն: Բելառուսն Ադրբեջանից ներկրում է ալյումին, նավթամթերք, գյուղատնտեսական արտադրանք: Այսօր Ադրբեջանում գործում է բելառուսական կապիտալով երեք ձեռնարկություն: Բելառուսում գործում է արդրբեջանական կապիտալով 18 ընկերություն և 30 համատեղ ձեռնարկություններ:

Երկու երկրների արտադրական կոոպերացիայի առաջատարը Գյանջայի ավտոմոբիլային գործարանն է, որտեղ 9 տարվա ընթացքում արտադրվել է 6.5 հազար Բելառուս տրակտորներ և ավելի քան երեք հազար ՄԱԶ բեռնատարներ: Ադրբեջանը Բելառուս է արտահանում նաև նավթ ու նավթամթերք: Հոկտեմբերի 19-ին Օդեսայի նավահանգիստ է ժամանել 84,7 հազար տոննա ադրբեջանական նավթ՝ Բելառուսի համար, փոխանցում է նավահանգստի մամուլի ծառայությունը: Նավթն երկաթգծով տեղափոխվելու է Մոզիրսկի նավթավերամշակման գործարան:

Ինչ մնում է ՀՀ–ի շահերին, ապա մի շարք միջոցառումներ`բողոքի նոտա, ցույց Երևանում Բելառուսի դեսպանատան մոտ և քաղաքական–հասարակական մեծ աղմուկ ի պաշտպանություն Լապշինի`այո, դա անհրաժեշտ էր։ Սակայն պետք է խուսափել առավել կտրուկ ժեստերից`հնչում են պահանջներ խզել դիվանագիտական հարաբերությունները Բելառուսի հետ, խզել տնտեսական կապերը և այլն։ Հենց դա էլ Ադրբեջանի նպատակն է`խարխլել ՀՀ–ի ու ՀԱՊԿ–ԵԱՏՄ–ում նրա դաշնակիցների միջև կապերն ու Երևանին թողնել առանց ֆորմալ դաշնակիցների`Ղազախստանն ու Բելառուսը միշտ էլ քվեարկել ու գործել են հօգուտ Ադրբեջանի ու այդպես էլ լինելու է ապագայում։

Բելառուսում առկա է հայկական համայնք, առկա է տնտեսական կապերը ընդլայնելու ներուժ`չպետք է ընդհանրապես խաչ քաշել հայ–բելառուսական կապերի վրա, դա է Բաքվի ցանկությունը`Լապշինի գործն որևէ կերպ կհանգուցալուծվի, իսկ Բելառուս–ՀՀ հարաբերությունները կարող են այդպես էլ տարիներով մնալ սառեցված և կաթվածահար։