ՇՄԱԳ օրենքում փոփոխությունների նախագիծը դրվել է շրջանառության մեջ

ՀՀ բնապահպանության նախարարությունում տեղի է ունեցել «Շրջակա միջավայրի վրա ազդեցության գնահատման եւ փորձաքննության մասին» Հայաստանի Հանրապետության օրենքում փոփոխություններ եւ լրացումներ կատարելու մասին ՀՀ օրենքի նախագծի եւ «Հիմնադրութային փաստաթղթի  ռազմավարական էկոլոգիական գնահատման  իրականացման կարգը» մշակող աշխատանքային խմբի հերթական նիստը:

Ներկայացնելով աշխատանքային խմբի կատարած օրենքի փոփոխությունների փաթեթի եւ նոր կարգի հիմնական սկզբունքները` ՀՀ բնապահպանության նախարարի տեղակալ Խաչիկ Հակոբյանը շեշտել է, որ «Շրջակա միջավայրի վրա ազդեցության գնահատման եւ փորձաքննության մասին» օրենքում փոփոխություններ կատարելու անհրաժեշտությունն առաջացել է այն կիրառելու գործընթացում արձանագրված  բացերի հիման վրա, իսկ «Հիմնադրութային փաստաթղթի  ռազմավարական էկոլոգիական գնահատման  իրականացման կարգը» բխում է վերոհիշյալ օրենքի եւ Հայաստանի կողմից վավերացված «Անդրսահմանային ենթատեքստում շրջակա միջավայրի վրա ազդեցության գնահատման մասին» /ԷՍՊՈ/ կոնվենցիայի պահանջներից:

Օրինագծերի եւ ենթաօրենսդրական նորմատիվ իրավական ակտի մշակմանը մասնակցել են ՀՀ բնապահպանության նախարարության մասնագետները, միջազգային փորձագետները, ինչպես նաեւ աշխատանքներին մասնակցելու նախաձեռնություն հայտնած հասարակական կազմակերպությունների` Civil Voice եւ «Գիտակցիր իրավունքդ» հասարակական կազմակերպությունների ենրկայացուցիչներ:

«Շրջակա միջավայրի վրա ազդեցության փորձաքննական կենտրոն» ՊՈԱԿ-ի մասնագետ Ազգանուշ Դռնոյանը ներկայացրել է նախագծերով առաջարկված փոփոխությունները եւ տեղեկացրել, որ Civil Voice հասարակական կազմակերպությունից ստացած առաջարկների հիմնական մասն ընդունվել է աշխատանքային խմբի կողմից: Ծավալվել է շահագրգիռ քննարկում, ինչի արդյունքում որոշվել է նախագծերը դնել շրջանառության մեջ, ինչին պետք է հաջորդի սահմանված կարգով  դրանց վերաբերյալ հանրային քննարկումների կազմակերպումը: