Ոստիկանների վրա քար նետելու մեջ մեղադրվողների փաստաբանները պահանջում են պատիժը պայմանականորեն չկիրառել

Ոստիկանության աշխատակիցների նկատմամբ բռնություն գործադրելու եւ զանգվածային անկարգություններ հրահրելու մեջ մեղադրվող Արսեն Մկրտումյանի, Գագիկ Միքայելյանի եւ Սոսո Մարգարյանի պաշտպանները պահանջում են իրենց պաշտպանյալների նկատմամբ նշանակել մեղմ պատիժ` այն պայմանականորեն չկիրառելու պայմանով:

Այսօր` փետրվարի 2-ին, Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում Սոսո Մարգարյանի պաշտպան Արա Ղազարյանը մասնավորապես նշեց, որ նա չի կատարել իրեն մեղսագրվող արարքը:

«Սոսոն քար է նետել, երբ ոստիկանների կողմից լուսաձայնային նռնակ է ընկել նրա ոտքի մոտ, որից վնասվածք է ստացել: Սոսոյի նետած քարը, ինչպես որ տեսանյութից էլ է երեւում, ոչ ոքի չի վնասել: Սոսոն ու իր ընկերները փորձել են կանխել արյունահեղությունը: Եթե այդ ցույցերը չլինեին, իշխանությունները կարող էին ուժ կիրառել ՊՊԾ գնդում գտնվողների նկատմամբ»,- ասաց Արա Ղազարյանը:

Փաստաբանի խոսքով` եթե այնուամենայնիվ դատարանը որոշի, որ Սոսո Մարգարյանը մեղավոր է, պատիժը պայմանականորեն չկիրառվի:

Սոսո Մարգարյանն իր հերթին ընդգծեց` ինքը վատ բան չի արել. «Մենք փորձում էինք մեր ազատության, առողջության հաշվին թույլ տալ արյունահեղություն, չեմ կարծում` վատ բան ենք արել»:

Ամբաստանյալներից Գագիկ Միքայելյանի պաշտպանը` Անի Չատինյանը, նույնպես խնդրեց դատարանից արդարացնել իր պաշտպանյալի, կամ գոնե պատիժը պայմանականորեն չկիրառել:

«Գագիկ Միքայելյանը պատմության ուսուցիչ է, մասնակցել է ապրիլյան պատերազմին, խնամքին ունի անչափահաս երեխա: Հաշվի առնելով այս մեղմացուցիչ հանգամանքները` խնդրում եմ արդարացնել կամ նշանակել մեղմ պատիժ, որը սակայն պայմանականորեն չկիրառել»,- ասաց Անի Չատինյանը:

Գագիկ Միքայելյանն էլ նշեց, որ ինքը դիտավորյալ չի արել, ամեն ինչ ստացվել է հանգամանքների բերումով:

Արսեն Մկրտումյանի պաշտպան Արա Ղարագյոզյանը նույնպես միացավ իր գործընկերների պահանջին: Մկրտումյանը խնդրեց դատարանից մեղմ պատիժ սահմանել եւ հնարավորություն տալ իրեն:

Դատարանը հեռացավ խորհրդակցական սենյակ:

Նշենք, որ մեղադրողը 3 ամբաստանյալների համար պահանջել է դատապարտել երեք տարվա ազատազրկման:

Հիշեցնենք, որ ամբաստանյալներն ընդունել են իրենց առաջադրված մեղադրանքներն ու միջնորդել արագացված դատաքննություն անցկացնել: Դատարանը բավարարել էր միջնորդությունը:

Ըստ մեղադրական եզրակացության` Արսեն Մկրտումյանը, Գագիկ Միքայելյանը եւ Սոսո Մարգարյանը «Սասնա Ծռեր» խմբի կողմից հուլիսի 17-ին ՀՀ Ոստիկանության ՊՊԾ գնդի գրավումից հետո տեղի ունեցած զանգվածային անկարգությունների ընթացքում ոստիկանության աշխատակիցների նկատմամբ բռնություն են գործադրել եւ զանգվածային անկարգություններ հրահրել: Նրանք կալանավորված են: