Բժիշկը ծննդաբերության ընթացքում մանկաբարձական աքցան է կիրառել. նոր մանրամասներ նորածնի մահվան դեպքի մասին

Արմավիրի բժշկական կենտրոնից հունվարի 28-ին Երեւան տեղափոխված եւ մեկ օր անց մահացած նորածինը, նախնական տվյալով, ունեցել է արյան զեղում, քանի որ մանկաբարձ- գինեկոլոգ Նշան Գեւորգյանը ծննդաբերության ընթացքում կիրառել է մանկաբարձական աքցան: Այս մասին NEWS.am-ին պատմեցին ծննդատան բժիշկները:

«Ծննդկանը նեղ կոնքեր ուներ, պետք էր կեսարյան հատում անել, սակայն Նշան Գեւորգյանը որոշեց աքցանով հանել երեխային, որի ժամանակ էլ սեղմել է երեխայի գլուխը ու վնասել: Երեխան բարդություններով էր ծնվել, բայց վիճակը դեպի լավն էր գնում, այդ պատճառով երկրորդ օրը երեխային արհեստական կեր տվեցինք, մինչ այդ էլ երեխայի ստամոքսը մաքրել ենք մի քանի անգամ: Այնպես որ անհնար է, որ կերի հետեւանքով երեխայի վիճակը վատանար, քանի որ երեխան նորմալ մարսել է կերը, երեք ժամը մեկ անգամ նրան կերակրել ենք»,- ասաց մանկաբույժներից մեկը:

Բժիշկների պատմելով` երեխայի վիճակը կտրուկ վատացել է հունվարի 28-ին եւ ժամեր անց տեղափոխել են Երեւան «արյան զեղում, թթվածնային քաղց» ախտորոշմամբ:

Նշենք, որ ծնունդն ընդունած բժիշկը` Նշան Գեւորգյանը, այսօր աշխատանքի չի գնացել: Նրա բջջային հեռախոսը նույնպես անհասանելի է: Հիվանդանոցում տեղյակ չեն, թե ինչու նա աշխատանքի չի ներկայացել:

Ավելի վաղ մահացած նորածնի հարազատները պատմել էին հետեւյալը. «Հունվարի 26-ին տարել ենք հիվանդանոց հարսիս, բժիշկը` Նշան Գեւորգյանը, սկզբում ասաց, որ ամեն ինչ նորմալ է, իր ուժերով կունենա երեխային, ավելի ուշ էլ ասաց, թե ծանր ծննդաբերություն է սպասվում ու առանց մեր կարծիքը հայտնելու` վակուումով արեցին ծննդօգնությունը: Դրանից հեւտո մեզ հայտնեցին, թե երեխան մի քիչ պտղաջուր է կուլ տվել, բայց ամեն ինչ նորմալ է, գնացեք տուն»:

Մահացած նորածնի պապիկի պատմելով` հունվարի 27-ին արդեն իրենից արհեստական կեր են պահանջել եւ երեխային կերակրել: Գիշերն արդեն երեխայի վիճակը վատացել է, սակայն այդ մասին հարազատներին ոչինչ չեն հայտնել, միայն հունվարի 28-ին առավոտյան, երբ հարազատները կրկին հիվանդանոց են գնացել` ծննդկանին եւ երեխային տեսնելու, իմացել են այդ մասին. «Մեզ ասացին, որ Երեւանից կանչ են գրանցել ու փոքրիկին տեղափոխում են հիվանդանոց, մենք էլ նրանց հետեւից Երեւան են եկել: Այստեղ արդեն բժիշկները մեզ հայտնեցին, որ առանց պտղաջուրն ամբողջությամբ օրգանիզմից հանելու` երեխային կաթ են տվել, դրանից էլ վիճակը վատացել է: Մեզ ուղարկեցին արյուն բերելու, որից հետո հորդորեցին տուն գնալ: Հաջորդ օրն առավոտ իմացանք, որ երեխան մահացել է»: