Ազատության հրապարակում քաղաքական ալիք է բարձրանում իշխանության դեմ. ակտիվիստները քաղաքական ուժ են ձեւավորելու

Orer.am-ը գրում է.

Ազատության հրապարակում հավաքված քաղաքացիների թիվն այսօր էլ շատ էր,- հայտնում է Orer.am-ը: Հավաքված հանրությունը մեծ հույսեր է կապում այն երիտասարդների հետ, ովքեր, բարձրանալով հարթակ, փորձում են ինչ-որ մտքեր արտահայտել ու պայքարի տարբերակներ առաջ քաշել:

Նկատենք, որ «Ազատ Դեմոկրատներ» կուսակցության երիտթևի նախագահ Նարեկ Այվազյանը հայտարարեց, որ իրենց պահանջները ի սկզբանե դրվել են սոցիալական հարթության վրա, բայց դրանք քաղաքական պահանջներ են: «Այսօր մեր խաղաղ ցույցի մասնակիցներից ոմանց նկատմամբ բռնություն կիրառելով՝ տեղափոխեցին ոստիկանական բաժիններ: Կցանկանայի՝ տեղում քննարկումներ անցկացվեր ու առաջարկներ ներկայացվեր, որ մենք ինքնակազմակերպվենք: Կա՛մ շարունակում ենք նույն կերպով պայքարը, այսինքն՝ ոչ մի կազմակերպչական խումբ չի ձևավորվում, այլ լինելու են մարդիկ, ովքեր ուղղակի բարձրաձայնելու են ձեր խոսքը, կա՛մ ձևավորվում է հասարակական կազմակերպություն, կա՛մ քաղաքական կուսակցություն»,- հայտարարեց Ն. Այվազյանը:

Նրա խոսքով՝ այս շարժումը ի սկզբանե դրվել էր սոցիալական և քաղաքացիական հարթության վրա, բայց անկեղծ չէր ներկայացվել, քանի որ այն քաղաքական էր՝ ուղղված լինելով իշխանություններին. «Մեր շարժումը ժողովրդական է, ու ոչ ոք կուսակցական դրոշ այստեղ չի ծածանել, ու հուսով եմ՝ չի էլ ծածանի, բայց մեր պահանջները քաղաքական են»:

Իսկ Երեւանի ավագանու անդամ Դավիթ Սանասարյանն էլ հայտարարեց, թե ինքը հացադուլ է անում: Նա նշեց, որ իր բողոքն ուղղված է ոչ թե իշխանություններին, այլ՝ հասարակությանը՝ ասելով, թե այսօր Ազատության հրապարակը պետք է բազմամարդ լիներ, ինչն այդպես չէ: Նա իր հացադուլով մարդկանց կոչ է անում գալ Ազատության հրապարակ և բազմամարդ լինելու դեպքում վերադառնալ Բաղրամյան պողոտա:

Թե իրականում ինչի են փորձում վերածել էլ. սակագնի պայքարը, արդեն հասկանալի է:

Նկատենք, որ Ազատության հրապարակում նաև նախագահի հրաժարականի կոչեր էին հնչում:

Սոսե Չանդոյան