Ես գեյ չեմ. Դիմահարդարվող տղան պատասխանում է քննադատություններին

Լife.panorama.am-ը գրում է . 

Արդեն երկու օր է, ինչ համացանցի հիթ է դարձել հայ դիմահարդար տղայի՝ Արամ Խաչատրյանի, տեսանյութը, որտեղ նա շպարվում է: Տեսանյութից հետո գրեթե բոլորը սկսեցին նրան քննադատել՝ ընդհուպ մինչեւ անձնական վիրավորանքներ հնչեցնել:

Life.panorama.am-ը Արամի հետ զրույց է ունեցել՝ խոսելով նրա հետաքրքրություններից, ընտանիքի վերաբերմունքից ու քննադատություններից հետո իր ապրումներից:

-Արամ, մեկ տեսանյութ ու բոլորը սկսեցին Ձեր մասին խոսել: Ինչպես՞ եք գնահատում հասարակության նման վերաբերմունքը:

-   Հասարակությունը պարզապես վախենում է ամեն ինչից, ինչ նոր է: Ընդամենը մեկ շաբաթ առաջ հասարակությունը վախենում էր սեւամորթ տղայից, ով ամուսնացել է հայ աղջկա հետ: Հասրաակությունը վախենում է ամեն նորից ու անսովորից: Կան տղամարդիկ, ովքեր Make up չեն անում, բայց շատ ավելի վատ բաներ են անում ու այս երկիրը չի զարգանում հենց նման մարդկանց պատճառով: Բոլոր դեպքերում՝ ես Հայաստանից դուրս եմ մեծացել, 19 տարեկանում ենք ընտանիքով Սոֆիայից եկել Հայաստան ու իմ մտածելակերպում գուցե տարբերվող բաներ լինեն: Ինչեւէ, ես ընդունում եմ հասարակության կարծիքը, քանի որ ինքս էլ ուզում եմ, որ նրանք ինձ ընդունեն այնպիսին, ինչպիսին կամ: Միաժամանակ՝ չեմ ուզում հակասեմ ինքս ինձ. չեմ ուզում ինձ նայելով՝ մարդիկ տեսնեն իմ Make up-ը, ուզում եմ նրանք տեսնեն դիմահարդարման տակ թաքնված մարդուն: Ես առօրյայում չեմ շպարվում, դա պարզապես հոբբի է, դիմահարդարումից հինգ րոպե անց ես մաքրում եմ այն:

-Արամ, Ձեր հասցեին բազմաթիվ վիրավորական հայտարարություններ հնչեցին, այդ թվում եւ սեռական կողմնորոշման հետ կապված խոսքեր: Համարձակ ու անկեղծ լինելով՝ կասե՞ք դուք ունեք ոչ ավանդական սեռական կողմնորոշո՞ւմ:

-    Ես գեյ չեմ: Եթե ես այդպիսին լինեմ, կասեմ: Եթե համարձակություն ունեմ նման տեսանյութ հրապարակելու, ապա նույն համարձակությամբ կասեի նաեւ, որ գեյ եմ: Պարզապես ինձ մոտ հակումների հետ կապված խնդիր կա, իմ օրգանիզմն ավելի շատ կանացի հորմոններ է արտահայտում, քան տղամարդկային: Դեռ փոքրուց ինձ դուր էին գալիս աղջկական խաղալիքները, գույները, հետաքրքությունները, աղջիկների հետ ընկերանալը եւ այլն:

-Ձեր կյանքում ինչ-որ մեկը կա՞:

-   Ոչ, այս պահին ես ազատ եմ:

-Հայկական ընտանիքներում ընդունված չէ, երբ տղան կարող է Ձեզ նման առաջադեմ հայացքներ ունենալ: Հետաքրքիր է՝ Ձեր հետաքրքրությունների վերաբերյալ ի՞նչ վերաբերմունք ունի Ձեր ընտանիքը:

-   Ես դաստիարակվել եմ շատ խիստ մթնոլորտում, թեեւ կրկնվեմ՝ փոքր տարիքից ունեի այս հակումը: Ծնողներս շատ խիստ են եղել, պատժել են, արգելել ինձ աղջկական հետաքրքրություններով տարվել, բայց բնության դեմ ոչինչ չես անի: Եղբայրս, ով նույն տանն է մեծացել, չունի այդ խնդիրը, իսկ ես ունեմ, նշանակում է՝ դա դաստիարակության խնդիր չէ: Ինչ մնում է այսօր  նրանց վերաբերմունքին՝ հայրս երկու տարի առաջ է մահացել, իսկ մայրս  տիպիկ հայ կին է, իմ քայլերի հետ կապված կան բաներ, որ իրեն դուր չեն գալիս, բայց նաեւ նա սիրում է իր երեխային: Չեմ կարող խաբել ու ասել, թե մայրս ասաց, որ շատ ուրախ է իմ նման քայլի համար, բայց սա իմ կյանքն է ու ես կարողացել եմ իմ մեջ այդքան համարձակություն գտնել, որ անեմ այն, ինչ ինձ դուր է գալիս:

-Արամ, ովքե՞ր են Ձեր ընկերները:

-    Իմ ընկերների 90%-ը մարդիկ են, ովքեր ունեն ավանդական սեռական կողմնորոշում ու իմ այս քայլն իրենց համար նորմալ է: Նրանք ինձ ընդունում են այնպիսին, ինչպիսին կամ: Նրանք շարունակում են ինձ հետ ընկերություն անել, ավելին՝ ընկերներիս շարքը ֆեյսբուքում էլ գնալով ավելանում է: Ես տեսանյութը հրապարակելուց հետո հարյուրավոր նամականեր եմ ստացել, որտեղ անծանոթ մարդիկ անգամ ողջունել են իմ այս է քայլը: Անձնական նամակով չի եղել գոնե մեկ վատ մեկնաբանություն:

-Իսկ վատ մեկնաբանությունները, որոնցում անգամ հայհոյանքներ կան, որեւէ կերպ ազդո՞ւմ են Ձեր վրա:

-    Ինձ ոչ մի կերպ չեն կոտրում կամ հիասթափեցնում նման վատ մեկնաբանությունները: Շատերին անգամ, երբ փորձեցի պատասխանել, միանգամից ասացին, թե կատակ են անում ու որ սա իմ կյանքն է, ես պետք է տնօրինեմ: Այդ դեպքում անգամ չգիտեմ, թե ոնց վերաբերվեմ նրանց: Վատ մեկնաբանություններ գրում են նրանք, ովքեր չունեն անձնական կյանք ու ատում են բոլորին, նրանք ինքնահաստատվելու համար պետք է վատ բան անեն, որ իրենց գոնե մի քիչ լավ զգան:

-Տեսանյութերը շարունակական բնույթ կկրե՞ն:

-   Նախ ասեմ, որ ես սովորել եմ Քիմ Քարդաշյանի Make up արտիստի մոտ, որը փաստող սերտիֆիկատը դեռ ինձ մոտ չէ, բայց ավելի ուշ այն ցույց կտամ: Ես պրոֆեսիոնալ Make up արտիստ եմ ու պայմանագրեր ունեմ իմ աշխատանքում օգտագործվող նյութերի կազմակերպության հետ: Ինչ վերաբերում է տեսանյութերին, գուցե շարունակական բնույթ կրեն, բայց առաջին տեսանյութը ես արել էի իմ մտերիմների համար, սակայն իմ ծանոթներից մեկը, ով գեյ է, ինձ վատություն անելու նպատակով այն տեղադրեց համացանցում ու այդպես տարածում գտավ: Պետք է մի բան էլ հաշվի առնել, որ սա ընդամենը Make up է, որն անում են բոլորի կողմից շատ սիրված դերասաններն ու երգիչները, անգամ շատ տղամարդկային արտաքին ու մարմին ունեցող տղաներն են եթերից առաջ դիմահարդարվում, որոնց աղջիկները շատ են սիրում, տղաներն էլ չեն քննադատում: