Սուրեն Կարայանը եւ ՌԴ արդյունաբերության եւ առեւտրի նախարարը Մոսկվայում համագործակցության հուշագիր են ստորագրել

Մոսկվայում Հայաստանի Հանրապետության վարչապետ Կարեն Կարապետյանի եւ Ռուսաստանի Դաշնության վարչապետ Դմիտրի Մեդվեդեւի ներկայությամբ Հայաստանի Հանրապետության տնտեսական զարգացման եւ ներդրումների նախարար Սուրեն Կարայանը եւ Ռուսաստանի Դաշնության արդյունաբերության եւ առեւտրի նախարար Դենիս Մանտուրովը Մոսկվայում համագործակցության հուշագիր են ստորագրել, որը միտված է արդյունաբերության եւ առեւտրի բնագավառում հայ-ռուսական փոխգործակցության խորացմանը։ 

Այս հուշագրով կողմերը կաշխատեն Հայաստանի Հանրապետության եւ Ռուսաստանի Դաշնության միջեւ առեւտրի ծավալների ավելացման եւ կառուցվածքի կատարելագործման, փոխադարձ առեւտրում ավանդական, ինչպես նաեւ բարձր տեխնոլոգիական եւ նորարարական  արտադրանքի մասնաբաժնի ավելացման եւ դիվերսիֆիկացիայի ուղղությամբ միջոցառումների մշակման ուղղությամբ։ Նախարարների ստորագրած փաստաթղթով կստեղծվի  աշխատանքային խումբ` Հայաստանի Հանրապետության եւ Ռուսաստանի Դաշնության արդյունաբերության բնագավառում գործունեություն իրականացնող սուբյեկտների միջեւ համագործակցության ընդլայնման եւ խորացման ճանապարհային քարտեզի մշակման նպատակով։

Նախարար Սուրեն Կարայանի եւ ՌԴ տնտեսական զարգացման նախարար Մակսիմ Օրեշկինի կողմից մեկ այլ փաստաթուղթ  է ստորագրվել «Միջտարածաշրջանային համագործակցության 2016-2021 թթ. Ծրագրի» վերաբերյալ։ Այս ծրագրով նախատեսվում է.

• միջտարածաշրջանային ծրագրերի եւ համատեղ նախագծերի իրականացում, որոնք ունեն առաջնային կարեւորություն երկու պետությունների տարածաշրջանների սոցիալ-տնտեսական զարգացման տեսանկյունից, այդ թվում նաեւ առողջապահական, կրթական, գիտական, մշակութային եւ զբոսաշրջության ոլորտներում,

• համատեղ մրցունակ ձեռնարկությունների ստեղծում, այդ թվում նաեւ Հայաստանի Հանրապետության վարչատարածքային կազմավորումների եւ Ռուսաստանի Դաշնության սուբյեկտների միջեւ համագործակցության առաջնային ոլորտներում բարձր տեխնոլոգիական ապրանքների թողարկում,

• փոքր եւ միջին ձեռնարկատիրության ոլորտում համատեղ նախագծերի իրականացում,

•  տեղեկատվական եւ այլ փոխգործակցության համակարգերի գործարկում,

• արդյունավետ փոխգործակցության իրականացում զբաղվածության եւ աշխատանքային միգրացիայի, տարածքային պլանավորման, մրցակցային քաղաքականության, ազգամիջյան քաղաքականության, մշակույթի, գիտության եւ կրթության, ԶԼՄ-ների, գրահրատարակչության եւ այլ ոլորտներում։

Ստորագրված փաստաթղթով կողմերը պայմանավորվել են իրականցնել մի շարք այլ քայլեր,  Հայաստանի Հանրապետության եւ Ռուսաստանի Դաշնության իշխանության մարմինների միջոցով` համաձայն սահմանված Ծրագրի միջոցառումների պլանի։