Շաքիի ջրվեժը տեսնելու համար կարիք չի լինի ոչ մեկին դիմել. այն կգործի բնականոն ռեժիմով

Հասարակություն 20 Հունվար, 2017 23:00

Որոտանի կիրճում, Սիսիանից 3 կմ դեպի հյուսիս–արևմուտք, Որոտանի վտակ Շաքի գետի վրա գտնվող Շաքիի ջրվեժն այլևս հնարավոր կլինի տեսնել ցերեկվա ցանկացած ժամի:

Հունվարի 13–ին Բնապահպանության նախարարությունում կայացել է քննարկում Շաքիի ջրվեժի և «Շաքի ՓՀԷԿ»–ի խնդրի կարգավորման վերաբերյալ, որին մասնակցել է նաև «Շաքի ՓՀԷԿ»–ի համասեփականատեր Աղասի Հակոբջանյանը:

Ինչպես տեղեկանում ենք Բնապահպանության նախարարության կայքից՝ Բնապահպանական պետական տեսչության պետ Հակոբ Գալստյանը ներկայացրել է «Հակոբջանյանի և Գալստյանի ՀԷԿ» ՍՊԸ–ում 2016 թ. հոկտեմբերի 31–ին կատարված ստուգումների արդյունքները, համաձայն որոնց բացահայտվել է, որ 2015 թվականի մայիսին ընկերությանը տրվել է ՋԹ 1500 լ/վրկ. ՓՀԷԿ–ի շահագործման համար և այս ջրաքանակի շահագործման դեպքում արդեն չի պահպանվում ջրվեժի համար անհրաժեշտ էկոլոգիական թողքը /200 լ/վրկ/:

Բնապահպանության նախարար Արծվիկ Մինասյանը նշել է, որ որոշումը բալանսավորված պետք է լինի և՛ բնապահպանական, և՛ տնտեսական առումով և առաջարկել քննարկման թեմա դարձնել ջրօգտագործման թույլտվության այնպիսի ռեժիմը, որն օրվա ցերեկային ժամերին հնարավորություն կտա ջրահոսքն ամբողջությամբ ուղղել դեպի ջրվեժ, իսկ գիշերը՝ դեպի ՓՀԷԿ–ը:

«Այնպիսի իրավիճակ է, որ եթե անգամ ՓՀԷԿ–ը պահպաներ էկոլոգիական թողքը, միևնույն է չէինք ունենա լիարժեք թողք: Խոսքը՝ ջրվեժի առաջացման, ամբողջական բնապատկեր ունենալու և ջրվեժի ամբողջ ներուժն օգտագործելու մասին է»,– նշել է նախարարը: Այս առաջարկը հավանության է արժանացել նաև «Շաքի ՓՀԷԿ»–ի համասեփականատիրոջ կողմից: Արծվիկ Մինասյանը հանձնարարել է սեղմ ժամկետում պատրաստել և հաստատել ՓՀԷԿ–ի ցերեկային և գիշերային ժամերի աշխատանքների կառավարման նախագիծը:

Հիշեցնենք, որ երկար տարիներ Շաքիի ջրվեժը տեսնել ցանկացողները բախվում էին կամ միջնորդ գտնելու, կամ գումար տալու տարբերակով մի քանի րոպեով ջրվեժը միացնելու և այն տեսնելու խնդրին: «Շաքի ՓՀԷԿ»–ի համասեփականատեր Աղասի Հակոբջանյանը մի քանի տարի առաջ «Էկոլուրին» տրված հարցազրույցում սրա հետ կապված ասել էր, թե չկա մեկը, որ ուզենա տեսնել Շաքիի ջրվեժը և որևէ դժվարության հանդիպի: Ըստ նրա՝ այցելուները կարող են զանգահարել իրեն և խնդիրը կլուծվի, 15–30 րոպեով մասնակիորեն կդադարեցվի ՀԷԿ–ի աշխատանքը, կփակվի փականներից մեկը, ջրերը բաց կթողնվեն և ջրվեժը կստանա իր տեսքը:

Ամեն դեպքում նախորդ շաբաթ կայացած քննարկման արդյունքում, Հակոբջանյանին զանգահարելու կարիք, հուսանք, այլևս չի լինի:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ