Ամանորը հայերը նախընտրել են նշել Դուբայում, Եգիպտոսում և Թբիլիսիում
Հասարակություն
Շատերի համար Ամանորը մի տոն է, որ պիտի նշել նեղ ընտանեկան միջավայրում, հարազատների ու բարեկամների շրջապատում: Տնից տուն այցելությունները, տոլման ու մայրաքաղաքային աղցանն էլ՝ անպակաս են մեր հայկական սեղաններից: Այս ամենից, իհարկե, երբեմն ցանկություն է առաջանում խուսափել՝ մի տեղ գնալ, հեռու բոլորից, լինելով միայնակ կամ գոնե միայն քո ընտանիքի հետ միասին: Ինչ–որ տեղ գնալու, հեռանալու, տոներն այլ վայրում նշելու հնարավորություն, սակայն, ոչ բոլորն ունեն:
Վերջին տարիներին հայերի շրջանում մեծ համբավ են վայելում Դուբայը, Եգիպտոսը, Պրահան, իսկ այս տարվա տվյալներով նաև Թբիլիսին: Այս քաղաքներում իրենց ամանորյա հանգիստը նշելու պատրաստ քաղաքացիների թիվը տարեցտարի ավելանում է: Եվ եթե դեպի Դուբայ և Եգիպտոս թանկարժեք տուրիստական փաթեթները, որոնք միջինում 7–8 օրվա համար մեկ անձից պահանջում են մոտ 900–1300 ԱՄՆ դոլարի ծախս՝ ներառյալ ամանորյա գիշերվա գալա ընթրիքը, ապա Թբիլիսին այս առումով ավելի համեղ պատառ է: Այստեղ ամանորյա եռուզեռը մեր քաղաքացիների համար միջինում կարժենա 250–500 ԱՄՆ դոլար՝ կախված, թե այդ տուրփաթեթը քանի օր է ներառում և թե ինչ կարգի հյուրանոցում եք պատրաստվում կանգ առնել:
Ամանորյա օրերին Հայաստանից մեկնողներ այս տարի շատ են եղել, բայցև Հայաստան եկողների թիվն էլ քիչ չէ: «Զվարթնոց» օդանավակայանի մամուլի հարցերով պատասխանատու Գևորգ Աբրահամյանը «Փաստի» հետ զրույցում նշեց, որ թեև դեռ պաշտոնական թվեր չկան կապված տարեվերջյան օրերի մեկնումների և ժամանումների վերաբերյալ, սակայն օդանավակայանի աշխատակազմը Ամանորի օրերին աշխատել է ամբողջական ռեժիմով, չարտերներ էլ են ավելացել: Ըստ նրա՝ ծանրաբեռնվածությունն այս տարի ավելի շատ է եղել:
«Ուղևորահոսքը նախորդ տարիների համեմատությամբ այս անգամ ավելի շատ է եղել: Միաժամանակ նշեմ, որ դեպի Հայաստան նույնպես շատ է եղել ուղևորահոսքը: Եվ տոներից հետո էլ հոսքը չի նվազել: Դրսից շատ եկողներ կան: Ես իմ աչքի տեսածն եմ ասում, իհարկե, ոչ պաշտոնականը: Դահուկներով մարդիկ են շատ գալիս Հայաստան»,– հավելեց նա:
«Ֆլայ Դուբայ» ավիաընկերությունից «Փաստին» տեղեկացրին, որ դեկտեմբերի 27–ից իրենք ունեցել են օրական երկու չվերթ: Դրանք ավելացված չվերթներ են եղել: Այս ավիաընկերությունից օգտվողների 90%–ը դեպի Դուբայ են մեկնել, իսկ Դուբայից հետո ավելի շատ նախընտրել են Շրի–Լանկա, Գոա և Թայլանդ մեկնել՝ Ամանորը նշելու նպատակով:
«Գլոբուս տուրս» տուրիստական գործակալության համար անցած Ամանորին արտերկիր մեկնողների թիվը նվազել է նախորդ տարիների համեմատությամբ: Ըստ աշխատակցի՝ դա կապված է քաղաքացիների ֆինանսական հնարավորությունների հետ: Իրենց գործակալությունից օգտվողները երկու ուղղություն են նախընտրել ամանորյա գիշերը անցկացնելու համար՝ Դուբայ և Եգիպտոս:
«Ջոյ տուր» տուրիստական գործակալությունից «Փաստին» տեղեկացրին, որ իրենց գործակալությունից օգտվողները այդ օրերին հիմնականում մեկնել են ավելի տաք երկրներ՝ Դուբայ և Եգիպտոս: Սակայն այս ուղղություններից ավելի մեծ պահանջարկ է ունեցել Թբիլիսին: Այս տարի «Ջոյ տուրի» ծառայություններից օգտվողները կրկնակի շատ Թբիլիսի են մեկնել, քան Դուբայ: Գործակալության աշխատակցուհու խոսքով` հարցումները նույնպես շատ են եղել՝ անկախ նրանից իրենցից են օգտվել, թե ոչ:
«Եգիպտոսը այս տարի ավելի մեծ հանրաճանաչություն ուներ մեր քաղաքացիների շրջանում, քան նախորդ տարիներին: Երևի 2015 թ. պասիվությունը բացատրվում է ավիավթարով, որը այդ տարվա նոյեմբեր ամսին տեղի ունեցավ՝ ռուսական չվերթի հետ: Հիմա ավելի շատ են Եգիպտոս մեկնողները, երևի անցավ վախը»,– նշեց գործակալության աշխատակցուհին: Նրա տեղեկացմամբ այս Ամանորին Դուբայից, Եգիպտոսից և Թբիլիսիից հետո ավելի շատ ուղևորվել են դեպի Իտալիա և Պրահա:
1
2
3
4
5
1
2
3
4
5
2
3
4
5
