«Ղափանում բժիշկ չկա, հիմարների հավաքածու է». «Կապանի ԲԿ»-ի աշխատակիցները դիմել են Սերժ Սարգսյանին

«Կապանի Բժշկական Կենտրոնի» աշխատակիցները բաց նամակով դիմել են ՀՀ նախագահին՝ Սյունիքի մարզում եւ մասնավորապես Կապանի ԲԿ-ում ստեղծված լարվածությունը լուծելու տարբերակ առաջարկելով մարզպետի հրաժարականը եւ հեռացումը Սյունիքից:

Բաց նամակում, մասնավորապես, ասվում է.

«Ձեզ ենք դիմում Կապանում ստեղծված իրավիճակի հետ կապված: Վահե Հակոբյանի մարզպետ նշանակելուց հետո հույսեր էինք փայփայում առավել հանգիստ հետագա աշխատանքները կազմակերպելու մասով: Սակայն, ցավոք սրտի, մարզպետի գործողությունները կրում են դեստրուկտիվ բնույթ:

Մարզպետը փորձում է իր անձնական ամբիցիաները իրականացնել օգտվելով իր պաշտոնից, հետապնդումներ է իրականացնում տարբեր անձանց նկատմամբ, ներառյալ Կապանի Բժշկական Կենտրոն ՓԲԸ տնօրինության եւ աշխատակիցների:

2016 թ. ավարտին եւ 2017 թ. սկզբին ցավոք մի շարք դեպքեր արձանագրվեցին, որոնցից մեկով հիմա ընթացքի մեջ է նախաքննությունը, իսկ մյուս երկուսով առերեւույթ բացակայում է բուժանձնակազմի մեղավորությունը:

Մարզեպտարանի կողմից իրականացվել է ձեւական քննություն (որի իրավասությունը ի դեպ Մարզպետը չունի), սակայն քննության արդյունքները որեւէ կերպ չեն ներկայացվել համապատասխան անձանց, որեւը բացատրություն տալու (դեռ պարզի չի ինչ հանգամանքների վերաբերյալ) հնարավորություն չի տրվել բժիշկներին, տնօրինեն, եւ դրանց հիման վրա տարբեր ասեկոսներ են տարածվում քաղաքում:

Այսպես, 2017 թ. հունվարի 13 մարզպետի եւ մարզպետարանի աշխատակիցների կողմից անձամբ մարզպետարան են հրավիրվել առնչվող անձինք եւ հարազատները, ում թյուր տեղեկատվություն է տրամադրվել բժշկական կենտրոնի կողմից կոպիտ եւ ակնհայտ սխալ բուժում իրականացնելու վերաբերյալ, եւ ուղղորդել են հիվանդանոց բժիշկներին եւ տնօրին աշխատանքից հեռացնելու պահանջով:

Նշված լարվածությունը բուժանձնակազմի համբերատար մոտեցման արդյունքում հնարավոր եղավ մեղմել եւ մարել, սակայն մարզպետարանի եւ անձամբ մարզպետի կողմից նշված անձանց կրկին հորդորներ են հետեւել շարունակել պայքարը, քանի որ «Ղափանում բժիշկ չկա, բոլորը մսագործ են, գործից բան չեն հասկանում, հիմարների հավաքածու է» եւ նմանատիպ պնդումներով:

Ի դեպ, Կապանի Բժշկական կենտրոն ՓԲԸ-ում վերջին տարիներին պարբերաբար անց են կացվել մի շարք ստուգումներ, որոնցից վերջինը եղել է մարզպետի պահանջով նախորդ տարվա աշնանը, որոնց արդյունքում որեւէ խախտում չի հայտնաբերվել: Չնայած դրան, ոլորտի մասնագետների պնդումներին, առողջապահության նախարարության հորդորներին, մարզպետը եւ մարզպետարանի մի շարք աշխատակիցներ միեւնույնն է համոզված են, որ հիվանդանոցում տիրում է ոչ բարվոք վիճակ:

Ավելին, տարեսկզբին Կապանի պոլիկլինիկայի բուժանձնակազմի հետ հանդիպման ժամանակ, երբ քննարկման շրջանակներում բարձրաց բժիշկներից մեկի՝ ազատագրական պատերազմին ակտիվ մասնակցությունը՝ խնդրանքով վարչական գործընթացներում ոչ էական թերացմանը առավել մեղմ վերաբերվելու հորդորին, մարզպետը, ավելի քան 30 բժիշկների ներկայությամբ պնդեց, որ «հերիք է պատերազմի թեման բարձրացնեք, ի՞նք եք արել որ, ձեր տանը դուք ու Ղարաբաղցիները ապրել եք, ինչ պիտի անեիք որ, ոչ մի հերոսական բան չկա, հերոսները Երեւանցիներն ու Լենինականցիներն են, որ եկել են Ձեր տունը պաշտպանել, թարգեք»:

Մեծարգո պարոն նախագահ,

Խնդրում ենք Ձեր միջամտությունը, Սյունիքի մարզում բարոյահոգեբանական նորմալ վիճակ վերականգնելու գործում: Ստեղծված իրավիճակում կարծում ենք, որ լարվածությունը լուծելու տարբերակը մարզպետի հրաժարականն է, եւ հեռացումը Սյունիքից: Սյունիքի եւ Ղարաբաղի հերոսները չեն կարող հաշտվել նման մոտեցման հետ»:

Ավելի վաղ NEWS.am_ը հայտնել էր, որ Սյունիքի մարզպետ Վահե Հակոբյանի հրամանով Կապանի բժշկական կենտրոնի գլխավոր բժիշկ Սմբատ Օրբելյանն ազատվել է աշխատանքից:

Հիշեցնենք, որ 2016-ի դեկտեմբերի 25-ին Կապանի բժշկական կենտրոնում գրանցվել էր նորածնի, այնուհետեւ վերջինիս մոր՝ 26-ամյա Մարինե  Իվանյանի  մահը: Նախնական տվյալներով՝ Մարինե Իվանյանը դեկտեմբերի 24-ին՝ ժամը 14:00-ին, «մահացած պտուղ» ախտորոշմամբ ընդունվել էր հիվանդանոցի մանկաբարձագինեկոլոգիական բաժանմունք, որտեղ հաջորդ օրը ժամը 11:30-ին, ծնվել է մահացած պտուղը, որին հաջորդել է բուժվող հիվանդ Մարինե Վարդանի Իվանյանի մահը:

Սյունիքի մարզային քննչական վարչությունում դեպքի առթիվ հարուցվել է քրեական գործ Քրեական օրենսգրքի 130-րդ հոդվածի 2-րդ մասով: Կապանի ԲԿ-ից մեզ հայտնել էին, որ կինը մահացել է արյունահոսության հետեւանքով: