Օհանյանի փաստաբանները

Այսօր մամլո ասուլիսում «Միացյալ հայեր» հասարակական-քաղաքական միավորման ղեկավարներ Ազատ Արշակյանն ու Արթուր Ալեքսանյանը հանդես եկել հայտարարությամբ, համաձայն որի իրենք որոշում են կայացրել առաջիկայում առաջկցել Սեյրան Օհանյանին, անկախ նրանից, թե ինչ ֆորմատով կունենա Օհանյանը իր դերակատարությունը առաջիկա խորհրդարանական ընտրություններին։ Այս հայտարարությունը մեղմ ասած տարօրինակ է այն պայմաններում, երբ Օհանյանն ըստ էության չի հստակեցրել իր մասնակցության ոչ ձևաչափը, ոչ էլ որևէ այլ հարց։ Սակայն պարզվում է, որ Գերագույն խորհրդի նախկին պատգամավորի ու նախկին զինովորականի կողմից այնքան մեծ է Սեյրան Օհանյանին աջակցելու ցանկությունը կամ գուցե հիացմունքը Պաշտպանության նախկին նախարարի նկատմամբ, որ նրանք կանխավ հայտնում են իրենց պատրաստակամությունը։

Առավել հետաքրքիր էին Արշակյանի պատասխանները մարտիմեկյան իրադարձություններին Օհանյանի մասնակցության վերաբերյալ հարցերին։ Ազատ Արշակյանը ոչ ավել, ոչ պակաս հայտարարում է, որ Օհանյանը հեռացել է համակարգից հենց այն պատճառով, որ համաձայն չի եղել Մարտի 1-ի և հոկտեմբերի 27-ի հետ։ Օհանյանին նման կերպ փաստաբանություն անելը արդեն հատում է երևակայության բոլոր սահմանները, քանի որ ըստ Արշակյանի տրամաբանության Սեյրան Օհանյանին մի դեպքում 9 մյուս դեպքում 18 տարի էր հարկավոր, որ իր համար պարզեր համաձայն է արդյոք մարտի մեկի և Հոկտեմբերի 27-ի հետ, թե ոչ կամ ընդհանրապես ինչ է նշանակում համաձայն լինել կամ չլինել նման ոբերգական ու ահաբեկչական իրադարձությունների հետ։ Արդյոք Արշակյանի կարծիքով հայաստանում կան քաղաքական գործիչներ կամ ուժեր որոնք համաձայն են եղել այս զարգացումների։

Չնայած մյուս կողմից կարծես թե մարտի մեկի հետ համաձայն է հենց Վարդան Օսկանյանը, որի հետ դաշինքի է պատրաստվում Սեյրան Օհանյանը, քանի որ իր հայտարարություններից մեկում Օսկանյանը հաստատեց, որ եթե հիմա էլ իշխանություն լիներ, կվարվեր այնպես, ինչպես 2008-ի մարտի մեկին։ Գուցե Արշակյանը տեղյակ չէ Օսկանյանի այս հայտարարությունից կամ գուցե չի հիշում, որ 2008 թվականի մարտի մեկին հենց Սեյրան Օհանյանն էր ներկայացնում երկրում արտակարգ դրության պայմանները, քանի որ Գլխավոր շտաբի պետն էր։

Ոչ պակաս հետաքրքիր էին նաև Արցախյան պատերազմի վետերան, նախկին զինվորական Արթուր Ալեքսանյանի անդրադարձերը մարտիմեկյան իրադարձություններին։ Ըստ Ալեքսանյանի այդ ողբերգական իրադարձությունները ցավալի էին, սակայն պետք է չե դրանց վրա կենտրոնանալ և պետք է շարժվել առաջ։ Թե ինչպես է Ալեքսանյանը պատրաստվում շարժվել առաջ մարտի մեկի իրադարձությունների առանցքային գործիչների հետ ձեռք-ձեռքի տված՝ առանց դրանց անդրադառնալու, չափազանց դժվար է ասել։

Վերջապես պետք է շեշտել, որ բոլորի համար էլ պարզ է, որ Օհանյան-Օսկանյան դաշինքի մեջ վաղուց արդեն քաղաքական անցուդարձերում գտնվող քաղաքական գործիչները վերակենդանանալու հնարավորություն են տեսել և փորձում են պարզապես օգտվել այս հնարավորությունից։ Նման վարքագիծը թերևս շատ ավելի ընդունելի ու առնվազն ակնեղծ կլիներ, քան երեսպաշտական այն փաստաբանությունը, որով փորձում են հանդես գալ տարատեսակ ժամկետանց քաղաքական գործիչներ։

Աղասի Մարգարյան

PressMedia.am վերլուծաբան