ՀՀ արդարադատության նախարարը Բաղրամյանում տիրող վիճակի, ՄԻԵԴ հայց ներկայացնելու եւ Պերմյակովին հայաստանյան դատական իշխանությանը հանձնելու մասին

Orer.am-ի հետ զրույցում ՀՀ արդարադատության նախարար Հովհաննես Մանուկյանը, խոսելով Բաղրամյան պողոտայում իրականացվող նստացույց-բողոքի ակցիայի մասին, նշեց, որ թեպետ հնչում են հայտարարություններ, թե պայքարը ապաքաղաքական է, այնուամենայնիվ, այն քաղաքական է.

-Այն լրջագույն հարցերը, որոնք հուզում են հասարակությանը եւ այն զարգացումները, որոնք տեղի են ունենում հասարակությունում, չեն կարող քաղաքական չլինել: Որեւէ ոլորտում կայացված որոշում, այս պարագայում էներգետիկայի բնագավառում` էլեկտրաէներգիայի սակագնի բարձրացումը, չի կարող քաղաքական չլինել:

Պարզապես ակցիայի կազմակերպիչների կողմից նման հայտարարություն արվեց, որպեսզի պայքարը չքաղաքականացվի եւ այլ երանգներ չտա: Թեպետ առիթ ունեցել եմ այս մասին խոսել, այնուամենայնիվ, կրկին կնշեմ, որ, այո՛, հասարակությունում նմանատիպ դրսեւորումներ հնարավոր են, քանի որ մենք ապրում ենք ժողովրդավարական երկրում, եւ խոսքի ազատությունը Հայաստանի անկախությունից հետո նոր ժողովրդավարության թերեւս ամենակարեւոր նվաճումն է. դա երեւում է եւ՛ լրատվամիջոցների, եւ՛ հավաքների ռեալիզացիայի տեսակետից:

Ընթացող գործընթացները ես ադեկվատ եմ գնահատում: Պետք է հավելեմ նաեւ, որ ոստիկանության գործողությունները եւս բավական գրագետ ու չափված էին, հատկապես վերջին օրերի ընթացքում: Կարծում եմ, որ սա եւս մեր պետականության հասունության մասին է խոսում, որովհետեւ ակնհայտ է, որ այն պրոֆեսիոնալիզմը գործողությունների եւ այն գրագիտությունը քայլերի, որոնց մենք ականատես ենք լինում մեր իրավասու պետական մարմինների, մասնավորապես ոստիկանության կողմից, վերջին տարիների լուրջ նվաճումն է:

-Չնայած տեղի ունեցած բախումից հետո բավական բարեկիթ են դարձել ոստիկան-ակտիվիստ հարաբերությունները, սակայն ՄԻԵԴ Հայաստանի դեմ հայց է ներկայացվել: Ի՞նչ քայլ է սա, կարեւորագույն պահին հարված Հայաստանի ողնաշարի՞ն, թե՞ մարդիկ պարզապես տեր են կանգնում իրենց իրավունքներին:

-Ես չէի ծայրահեղացնի իրավիճակը, որովհետեւ նման դեպքեր հնարավոր են աշխարհի ցանկացած երկրում, նույնիսկ կայացած ժողովրդավար երկրներում են նման բաներ պատահում: Տեսնում ենք, թե Հունաստանում, Թուրքիայում այս վերջին օրերին ինչեր են կատարվում:

Ոստիկանությունը չի կարող իր հիմնական գործառույթը` ոստիկանական կարգի պաշտպանությունը չիրականացնել: Անկեղծ ասած, ես այստեղ ողբերգություն չեմ տեսնում, ողբերգություն կլինի այն, որ մարդիկ վնասվեն կամ արյուն թափվի` Աստված հեռու պահի: Մենք խուսափել ենք այդ ամենից, որը շատ լավ է, ես ուրախ եմ, որ նման իրավիճակների չենք հանդիպել:

Հույս ունեմ, որ մեր հասարակության` ժամանակի ընթացքում հասունացող ժողովրդավարության մասին ընկալումները, մեզ հնարավորություն կտան հետագայում եւս խուսափել այսպիսի վատ դրսեւորումներից:

-Կարո՞ղ ենք ասել, որ հասարակության իրավագիտակցությունն է պարզապես բարձրացել:

-Ինչ խոսք, եւ՛ պաշտոնյաների, եւ հասարակության իրավագիտակցությունը բարձրացել է: Հասարակությունն ակնհայտ կերպով հասուն է դարձել:

-Պարոն Մանուկյան, վերջին զարգացումների հետ են կապվում Պերմյակովին հայաստանյան դատական իշխանությանը հանձնելու, Հրաչյա Հարությունյանին էքստրադիցիայի ենթարկելու հարցերը: Դուք կապ տեսնու՞մ եք Բաղրամյանում ընթացող պայքարի եւ Ռուսաստանի կողմից իրականացվող որոշումների միջեւ:

-Անկեղծ ասած, ես այս իրավիճակը չէի նմանեցնի առեւտրի: Կարծում եմ, որ այն ավելի կարեւոր ու առողջ գործընթաց է, չէի ցանկանա առեւտրային ինչ-որ էլեմենտներ մտցնել դրա մեջ, պարզապես պետք է ասել, որ նորմալ բնականոն երեւույթ է` հասարակությունում կարող է որոշակի հատված պահանջ ներկայացնել, իր մտահոգություններն ու խնդիրները բարձրաձայնել նաեւ հրապարակավ, իսկ մեր իրավասու պետական մարմինները բավական պրոֆեսիոնալ արձագանք կարող են տալ դրանց: Իսկ խնդիրներ միշտ են լինում, սխալ չկա այնտեղ, որտեղ չկա կյանք ու աշխատանք:

Սոսե Չանդոյան

Աղբյուրը՝ Orer.am