Դեկտեմբերին բարդություններ են առաջացել բեռնափոխադրումների հարցում

ՀՀ վարչապետի հանձնարարականի համաձայն, պետական եկամուտների կոմիտեի նախագահ Վարդան Հարությունյանի հրամանով տոնական օրերին մաքսային համակարգն աշխատել է արտակարգ ռեժիմով. մաքսային ծառայության առանձին ստորաբաժանումներում, մաքսային հսկողության գոտիներում ու մաքսային պահեստներում 31.12.2016-08.01.2017թ. ժամանակահատվածում հերթապահություն է իրականացվել:

ՊԵԿ-ից NEWS.am-ին հայտնում են, որ ըստ ՊԵԿ մաքսային վիճակագրության, վերլուծության եւ ռիսկերի կառավարման վարչության պետ Կարեն Բեգլարյանի, այդ օրերին մաքսային մարմինների կողմից երրորդ երկրներից ընդունվել է ներմուծման՝ 56 բեռնային եւ 1564 ուղեւորային հայտարարագիր, արտահանման՝ 14 բեռնային եւ 1504 ուղեւորային հայտարարագիր: Համապատասխանաբար հայտարարագրվել են 887.7 միլիոն եւ 187.8 միլիոն դրամ մաքսային արժեքով ապրանքներ եւ տրանսպորտային միջոցներ, գանձվել է շուրջ 211.7 մլն. դրամի չափով մաքսային վճար: Իսկ ԵԱՏՄ անդամ երկրներից ընդունվել է ներմուծման 355 եւ լրացվել՝  արտահանման 62 հայտարարագիր: Այդ օրերին մաքսային մարմիններում հայտարարագրվել է 114.5 տոննա սննդամթերք, 72 տոննա միրգ եւ բանջարեղեն, 296.5 տոննա ցորեն,  55.6 տոննա նավթամթերք եւ այլ ապրանք:

«Իրականացված հերթապահության նպատակն էր տոնական օրերին եւս պատշաճ ապահովել արտաքին տնտեսական գործունեություն իրականացնողների,  ֆիզիկական անձանց կողմից մաքսային սահմանով տեղափոխվող ապրանքների մաքսային ձեւակերպումների անխափան իրականացումը, ինչպես նաեւ շուտ փչացող եւ այլ ընթացիկ պլանավորում պահանջող ապրանքների արտահանումն ու ներմուծումը»,-ընդգծել է Կարեն Բեգլարյանը: Ամանորին ընդառաջ դեկտեմբեր ամսվա ընթացքում մաքսային սահմանով տեղափոխվող ապրանքների ծավալների աճին զուգահեռ  բարդություններ էին առաջացել նաեւ բեռնափոխադրումների մասով: Անբարենպաստ եղանակի  պատճառով Վերին Լարս մաքսային կետ փակ էր, նաեւ Փոթի նավահանգստում էին դժվարություններ առաջացել: Կարեն Բեգլարյանի խոսքով՝ տոնական օրերին մաքսային կանոնների խախտում չի արձանագրվել: Շուտ փչացող ապրանքների մասով նույնպես որեւէ խնդիր չի ծագել:

Ոչ աշխատանքային օրերին մաքսային մարմինների հետ հերթապահել են նաեւ սահմանային հսկողություն իրականացնող պետական մարմինները եւ առեւտրային բանկերը: