Ասին՝ մարդ չունենք, ախպեր ջան. Վանաձորի հիվանդանոցում չեն ընդունել թեւի կոտրվածքով երեխային. ԲԿ-ից այլ բան են ասում

Հունվարի 1-ին Վանաձորի բժշկական կենտրոնում չեն ընդունել ձեռքի կոտրվածքով 3 տարեկան երեխային: Այս մասին NEWS.am-ի հետ զրույցում ասաց երեխայի հայրը, որը չցանկացավ ներկայանալ: Նա պատմեց, որ երեխային ձեռքի կոտրվածքով տարել է Վանաձորի բժշկական կենտրոն, որտեղ նրան պատշաճ ուշադրություն եւ անհրաժեշտ բուժօգնություն չի ցուցաբերվել եւ ծնողները ստիպված երեխային տեղափոխել են Երեւան:

Ըստ երեխայի հարազատների պատմածի՝ հիվանդանոցում հերթապահ բժիշկ չի եղել, առաջարկվել է ռենտգեն հետազոտության համար երեխային տեղափոխել բժշկական կենտրոնի մյուս բաժանմունք, սպասել վնասվածքաբանի այցին, որը, սակայն, ուշացել է եւ ծնողները երեխային տեղափոխել են Երեւան:

«Ամսի 1-ին երեխեն ընկել էր, թեւը կոտրել էր, ցավում էր, լաց էր լինում: Տարանք բժշկի: Ժամը երեւի 15:30 կլիներ: Գնացի հիվանդանոց, ասացի՝ ցավում ա երեխու ձեռքը, մի հատ ռենտգեն անենք, ասավ՝ տար մանկական հիվանդանոց: Տարա մանկական, ասին՝ մարդ չունենք, ախպեր ջան, չգիտեմ ում զանգեցին, նա էլ, առանց երեխային տեսնելու ասեց՝ տար ռենտգեն գցի: Մի 10 րոպե սպասեցի, տեսա բժիշկը չկա, քշեցի, տարա Երեւան»,- նշեց փոքրիկի հայրը:

Վանաձորի բժշկական կենտրոնից, սակայն, հերքում են վերը նշվածը, ներկայացնելով դեպքի հետ կապված այլ մանրամասներ:

Վանաձորի բժշկական կենտրոնի մանկական վնասվածքաբան Ռուբեն Հակոբյանը, որը դեկտեմբերի 31-ն ու հունվարի 1-ի մինչեւ կեսօր տարբեր ծանր ու հրատապ դեպքերի պատճառով անցկացրել է հիվանդանոցում, պատմեց. «Ցերեկվա ժամին մի քանի րոպեով բացակայեցի հիվանդանոցից եւ այդ ժամանակ բերել են 3.5 տարեկան այդ երեխային, որին ես չեմ էլ տեսել: Ինձ զանգել են, որ գամ, ես 10 րոպեի ընթացքում եկել եմ, բայց երեխան տեղում չի եղել: Տեղում էր պապիկը: Ես ասեցի՝ որտե՞ղ է երեխան, ասաց՝ երեխան արդեն ճանապարհին է: Իրենք չեն ուզում մնան այստեղ, գնալու են Երեւան: Պապիկն իմ ներկայությամբ զանգահարեց իր տղային, ասեց՝ մի գնա, բժիշկը այստեղ է, բայց ստացավ կտրուկ ոչ պատասխանը»:

«Մի շարք մասնագետներ կան, այդ թվում մանկական վնասվածքաբանը, որ մարզում միակն են եւ հնարավոր չէ, որ անընդհատ նրանք ներկա լինեն հիվանդանոցում: Այդ պահին եղել է բժիշկ, ով երեխայի հետ կապված ասել է, որ կատարվի ռենտգեն հետազոտություն, բայց ծնողը հրաժարվել է այդ հետազոտությունից եւ երեխային մեզ համար անհասկանալի հանգամանքներից ելնելով տարել Երեւան»,- ասաց Վանաձորի բժշկական կենտրոնի մանկական վիրաբույժ Գագիկ Ղամբարյանը:

Վերջինի խոսքով, այդ պահին կենտրոնի մյուս մասնաշենքի վերակենդանացման բաժանմունքում է եղել մանկական անեսթեզիոլոգ Արթուր Սիմոնյանը, ով գտնվելով ծանր հիվանդի մոտ չի հասցրել գալ մյուս մասնաշենքից եւ առաջարկել է երեխայի թեւը ռենտգեն անել, որպեսզի ինքը նայի: