Դեսպան․ 2016-ի հունվար- հոկտեմբեր ամիսներին Հայաստանի ու Ղազախստանի ապրանքաշրջանառությունն աճել է 55․4 տոկոսով

Հայաստանի ու Ղազախստանի միջեւ ապրանքաշրջանառությունը բավականին ցածր է, անցած տարվա արդյունքներով այն կազմել է ընդամենը մոտ 5․5 մլն դոլար։ Այս մասին NEWS.am-–ին տված հարցազրույցում ասել է Հայաստանում Ղազախստանի արտակարգ ու լիազոր դեսպան Թիմուր Ուրազաեւը։

Դեսպանի խոսքով, երկկողմանի առեւտրային հարաբերություններում, ցավոք, շատ մեծ չօգտագործված պոտենցիալ կա «նույնիսկ օբյեկտիվ դժվարությունների պարագայում, առաջին հերթին՝ տրանսպորտային եւ լոգիստիկ բնույթի»: «Ե՛վ ղազախ, եւ՛ հայ գործընկերների համար այս թեման առաջնահերթ հարցերի կարգում է»․- ասել է Ուրազաեւը։ 

 Ապրանքաշրջանառության մեծ մասն իրականացվում է հայ գործարարների ուժերով հայկական արտադրանքի արտահանմամբ։ «Որպես կանոն, նրանք հայկական ծագումով մեր հայրենակիցներն են: Փոքր եւ միջին բիզնեսի տեսակետից մենք ռուս արտահանողների հետ մրցակցելու հնարավորություններ դեռեւս չունենք»,- ասել է դեսպանը։

Դիվանագետի կարծիքով Հայաստանում ներդրումային պայմաններն ավելի վատը  չեն, քան Վրաստանում: «Կարծում եմ՝ ներդրումային հնարավորությունները գուցե նույնիսկ ավելի լավն են: Գործում է Եվրամիության հետ Հայաստանի առեւտրի հրաշալի ռեժիմ՝ GSP+, որը եզակի հնարավորություն է տալիս Հայաստանի ոչ միայն ղազախ, այլեւ ցանկացած միջազգային գործընկերոջ երկրի տարածքում հաջողությամբ ներդրումներ կատարել»,- հավելել է Թիմուր Ուրազաեւը։

Հունվար–հոկտեմբեր ամիսներին, շարունակել է նա, Հայաստանի եւ Ղազախստանի միջեւ ապրանքաշրջանառությունն արդեն 55.4 տոկոսով աճել է։ «Իմ կարծիքով Ղազախստանի եւ Հայաստանի առեւտրի աճի կետ կարող են լինել առաջին հերթին առեւտրում՝ ապրանքների նոր նոմենկլատուրայի հայտնաբերում, որը պետք է պահանջարկ վայելի։ Ղազախստանի եւ Հայաստանի ապրանքաշրջանառության մեջ 98 տոկոսը հայկական ապրանքների արտահանումն է՝ գինի, կոնյակ, ոսկյա զարդեր։ Իսկ ղազախական արտահանումը 2016-ի հունվար–փետրվար ամիսներին կազմել է 294 հազար դոլար։ Ինչպե՞ս փոխել իրավիճակը։ Առաջին հերթին՝ պետք է մտածել այն մասին, թե ինչպես բարելավել Հայաստանից Վրաստանով դեպի Ռուսաստան, իսկ հետո Ղազախստան երթուղու հնարավորությունները՝ հաշվի առնելով «վերին Լարսի» աշխատանքի սեզոնայնությունը։ Պետք է զուգահեռ զարգացնել նաեւ հարավային երթուղին Իրանի եւ Թուրքմենիայի տարածքով դեպի Ղազախստան»,- նկատել է Թիմուր Ուրազաեւը։