Սթոլթենբերգը Ռուսաստանի հետ երկխոսության կոչ է արել

ՆԱՏՕ-ն Ռուսաստանի կողմից դաշինքի անդամ երկրներին ուղղակի սպառնալիք չի տեսնում եւ կարեւորում է Մոսկվայի հետ երկխոսության պահպանումը: Այս մասին հայտարարել է Հյուսիսատլանտյան դաշինքի գլխավոր քարտուղար Յենս Սթոլթենբերգը, հայտնում է DPA-ն:

Ի պատասխան հարցին՝ 2017-ին ՆԱՏՕ-ին ով ավելի էական վտանգ կներկայացնի՝ Ռուսաստա՞նը, թե՞ «Իսլամական պետություն» ահաբեկչական խմբավորումը, Սթորթենբերգը նշել է, թե «անիմաստ է Ռուսաստանը ԻՊ-ին համեմատելը», որը պատասխանատու է ՆԱՏՕ-ի երկրների մայրաքաղաքներում ահաբեկչությունների համար: «Մեր նպատակն է ԻՊ-ին ոչնչացնելը»,- հավելել է նա:

ՆԱՏՕ-ի ղեկավարը նշել է, որ Սիրիայի հակամարտության հարցում միասնական որոշման գալու ՄԱԿ ԱԽ-ի անընդունակությունը միջազգային հանրությանը թուլացնում է: Սթոլթենբերգի խոսքով՝ դաշինքն անհնար է համարում Սիրիայի իրավիճակին ռազմական միջամտությունը: «Առանց ՄԱԿ-ի հստակ մանդատի ռազմական ուժի կիրառումը միայն կխորացնի Սիրիայի հակամարտությունը եւ կհանգեցնի տարածաշրջանային ավելի խոշոր առճակատման»,- ասել է դաշինքի գլխավոր քարտուղարը՝ հավելելով, որ ՆԱՏՕ-ի գլխավոր նպատակը իր դաշնակիցներին եւ դաշինքի տարածքը պաշտպանելն է, ՆԱՏՕ-ն համաշխարհային ոստիկան չէ:

ՆԱՏՕ-ի ներկայիս գլխավոր քարտուղար Յենս Սթոլթենբերգի լիազորություններն ավարտվում են 2018 թվականին: ՆԱՏՕ-ի անդամ երկրները կարող են նրա պաշտոնավարումը եւս մեկ տարով երկարացնել, սակայն նրա տեղն, ամեն դեպքում, 2019-ին թափուր կմնա: