Բուքմեյքերական ընկերությունում մահացած բժիշկը հաճախ էր խաղադրույքներ անում

Բուքմեյքերական ընկերությունում մահացած վիրաբույժի՝ 50-ամյա Ահարոն Կարապետյանի հոգեհանգիստը կկայանա այսօր՝ մայիսի 11-ին:

NEWS.am-ի տեղեկություններով՝ Ահարոն Կարապետյանը ավելի քա 20 տարվա աշխատանքային փորձ ունի, աշխատել է նաեւ արտերկրում: Վերջինս ամուսնացած չէր, ապրում էր միայնակ: Նրա գործընկերները պատմում են, որ վիրաբույժը ֆուտբոլի մեծ սիրահար էր, հաճախ էր խաղադրույքներ կատարում: Իսկ թե ինչպես է եղել դեպքը, մեզ փոխանցեցին, որ «Տոտո» բուքմեյքերական ընկերությունում վիճաբանել է մեկ ուրիշի հետ, ընկել է գետին, երբ «Շտապօգնություն» են կանչել, արդեն արձանագրել են, որ մահացած է: Նախնական տեղեկություններով՝ նա հավանաբար մահացել է սուր ինֆարկտից:

Ավելի վաղ հայտնել էինք, որ ժամը 23:00-ի սահմաններում ոստիկանության կենտրոնական բաժին ահազանգ է ստացվել շտապօգնության ենթակայանից, որ բժիշկների խումբը կանչով մեկնել է Մաշտոց-Գրիգոր Լուսավորիչ փողոցների խաչմերուկում գործող «ՏՈՏՈ» բուքմեյքերական կենտրոն եւ ներսում հայտնաբերել են տղամարդու դի:

Shamshyan.com-ի փոխանցմամբ, դեպքի վայր ժամանած ոստիկաններն ու քննիչները պարզել են, որ մահացածը հանդիսանում էր Երեւան քաղաքի Կենտրոն վարչական շրջանի բնակիչ, 50-ամյա Ահարոն Կարապետյանը: Վերջինիս եւ մեկ այլ անձի միջեւ «ՏՈՏՈ» բուքմեյքերական կենտրոնում վիճաբանություն եւ քաշքշուկ է տեղի ունեցել, որի ժամանակ էլ Ա. Կարապետյանը կորցրել է հավասարակշռությունը եւ ընկել գետնին՝ գլուխն հարվածելով պատին, ինչն էլ դարձել է մահվան պատճառ:

Կայքի տեղեկություններով՝ Ա. Կարապետյանը հանրապետությունում ճանաչված վիրաբույժներից էր: Աշխատում էր թիվ 6-րդ հիվանդանոցում՝ որպես գլխավոր վիրաբույժ, մեծ հարգանք էր վայելում աշխատանքի վայրում եւ ընկերական շրջապատում ու նրա շնորհիվ բազմաթիվ կյանքեր են փրկվել:

Փաստի առթիվ քննչական բաժնում հարուցվել է քրեական գործ՝ ՀՀ քր. օր.-ի 109 հոդվածի (անզգուշությամբ մահ պատճառելը) հատկանիշներով: Քննիչի որոշմամբ նշանակվել են մի շարք փորձաքննություններ։