Բժշկի անկյուն. Ինչո՞ւ ենք շոգին գիրանում

Araratnews.am-ը գրում է.

Կարծես թե պետք է հակառակը լիներ. չ՞է որ շոգին մեծամասնությունը բողոքում է ախորժակի բացակայությունից, խանութներում սեզոնային միրգ ու բանջարեղենի առատություն է, որոնք, իրականում բջջանքի շնորհիվ լավ մարսողություն պետք է ապահովեն: Սակայն, փաստ է, որ հաճախ  քաշն ավելանում է հենց ամռանը: Ինչպե՞ս է դա կատարվում ու ի՞նչ կարելի է անել դրանից խուսափելու համար: Թվարկենք  այդ պատճառները`

Ջրի անբավարարություն

Մարգարեթ թագուհու համալսարանի (Շոտլանդիա) սննդաբանները պարզել են, որ տապին մարդու օրգանիզմը տառապում է ջրի անբավարարությունից, դրա համար էլ ավելորդ քաշ է հավաքում:

Ջրի անբավարարության պատճառով օրգանիզմում դանդաղում է էներգափոխանակումը, ինչը հանգեցնում է քաշի ավելացման:

Բացի այդ օրգանիզմի կողմից ծարավի «սխալ» ընկալումը կեղծ քաղց է առաջացնում ու չափից շատ  ուտելու հետևանքով էլ քաշ է ավելանում: Դրա համար էլ միշտ խորհուրդ են տալիս հատուկ հետևել  օգտագործվող հեղուկի քանակին:

Ջուր. այո, թե ոչ

Երկրորդ պատճառը կրկին ծարավն է: Երբ շոգին ծարավդ ցանկանում ես հագեցնել, բոլորը չէ, որ դա անում են մաքուր ջրով: Հաճախ ջրի փոխարեն գազավորված ըմպելիքներ` լիմոնադ, կվաս է օգտագործվում: Իսկ դրանք, բացի մեծ քանակությամբ շաքարից, նաև ավելորդ կալորիաներ են պարունակում: Շոգը ստիպում է ծարավը մեղմել ու հաճախ չենք նկատում, թե ինչպես ենք 1-2 լիտր գազավորված օգտագործում, իսկ հետո էլ զարմանում, թե որտեղից են այդ ավելորդ կգ-ները:

Ամառվա ուտելիքները

Ամառը մեր սնունդն էլ է փոխվում: Հատկապես հանգստի ժամանակ, արագ ու հաճախ ենք մի բան ուտում` արագ սննդի կետերի հրամցրած տեսականուց: Իսկ նման սնունդը հաստատ առողջ չի կարող համարվել:

Իսկ պաղպաղա՞կը`այն էլ ոչ մեկ հատ: Ստացվում է, որ վնասակար կալորիաների մի ամբողջ փնջով փորձում ենք մեղմել շոգը, որը հետո մեզ  քաշի տեսքով պետք է հիշեցնի շոգ ամառվա մասին:

»Շոգին ի՞նչ ճաշ»: Այո,  հենց այդպես էլ  շոգին ճաշը փոխարինում ենք բուտերբրոդներով, թեթև սնունդով, ինչն իրակամում այնքան էլ թեթև չէ: Իսկ շատերն էլ ցերեկվա շոգին չեն կարողանում բացարձակ ուտել, բայց երեկոյան երբ փոքր ինչ զովանում է, ապա ցերեկվա բացթողումը լրիվ ծրագրով լրացնում են կուշտ ընթրիքով:

Ամառվա սնման բոլոր առանձնահատկությունները բացասական ազդեցություն են ունենում մարմնի զանգվածի վրա:

Ամառվա ոչ լիարժեք քունը

Որ անլիարժեք քնից գիրանում են` գիտեն շատերը: Իսկ ամռանն անքնությունը, այս դեպքում կարելի է ասել` նորմալ երևույթ է: Քնել շոգին` հերոսություն է:

Անքնությունից տանջահար, փորձում ենք հանգիստ գտնել քաղցրի մեջ ու կրկին` գիրանում ենք:

Անբավարար շարժում

Ոմանք ամռանն անսովոր ակտիվություն են զգում, ոմանք էլ` հակառակը, չեն կարողանում կամ դժվարությամբ են շարժվում: Հենց վերջիններս էլ, սակավաշարժության պատճառով, գիրանում են: Իսկ դրանից խուսափելու համար բավականաչափ ֆիզիկական ակտիվություն պետք է ապահովել, օրինակ, առավոտ վաղ, երբ դեռ զով է, կարելի է վազել, իսկ երեկոյան` հնարավորության դեպքում ֆիթնես ակումբ հաճախել:

Կեղտոտ օդ

Ամռանը նաև օդի աղտոտվածությունն է ավելանում.քաղաքային  մշուշամպը, ինչպես նաև հրդեհներից բարձրացող ծուխը: Ապացուցված է, որ ածխաթթու գազի խտությունը օդում, հետևաբար նաև` արյան մեջ հանգեցնում է նյութափոխանակության խանգարման ու քաշի ավելացման:

Հետևություն կարելի է անել ասվածից` եթե քաղաքից դուրս գալու հնարավորություն ունեք, անպայման օգտվեք դրանից: