Stratfor. Ադրբեջանի կողմից «Երկաթե գմբեթ» գնելու պատճառներն անհայտ են

Stratfor ամերիկյան վերլուծական կենտրոնը գրել է Ադրբեջանի կողմից «Երկաթե գմբեթ» գնելու լուրերի մասին։

Կենտրոնի փորձագետները կասկածում են, որ այդ գնումը կարող է օգտակար լինել։ Հոդվածում նշվում է, որ Իսրայելի վարչապետից առաջ Բաքու էր ժամանել ՌԴ փոխվարչապետ Դմիտրի Ռոգոզինը, որը համակարգում է Մոսկվայի կողմից զենքի վաճառքը։ Այդպիսով՝ Ադրբեջանը ցանկանում էր այդ հարցում բաց լինել Ռուսաստանի հետ եւ հայտնել այն մասին, թե ինչ զենք է գնում Իսրայելից, եւ, ինչն առավել կարեւոր է, կխախտի արդյոք դա ռազմական բալանսը, որը Մոսկվան պաշտպանում է Հայաստանի եւ Ադրբեջանի միջեւ։

Սակայն, կենտրոնի փորձագետների խոսքով, գնումների դրդապատճառը անհայտ է մնում։ «Հայաստանը վերջերս «Իսկանդեր» բալիստիկ հրթիռներ գնեց, ինչն էապես մեծացնում է նրա ռազմական հնարավորությունները, սակայն «Երկաթե գմբեթի» մարտկոցներն անօգուտ են բարձր  թռչող Իսկանդերների դեմ»։ Հաղորդվում է, որ Ադրբեջանն արդեն ունի Ս-300 համակարգեր, որոնք արդյունավետ են Իսկանդեր հրթիռների դեմ։

Բացի այդ, պարզ չէ, թե քանի մարտկոց է գնում Ադրբեջանը։ Իսրայելը, օրինակ, 10 մարտկոց ունի՝ յուրաքանչյուրը 50 մլն դոլարով, իսկ հրթիռներից յուրաքանչյուրի արժեքը 100 հազար դոլար է։ «Ենթադրվում է, որ սահմանափակ ֆինանսական հնարավորությունները Ադրբեջանին թույլ չեն տա շատ մարտկոցներ գնել։ Բայց հաշվի առնելով, որ Ադրբեջանի եւ Իսրայելի միջեւ վերջին գործարքների մասին լուրերում նշվում է 5 մլրդ դոլար գումարը, Ադրբեջանը կարող էր մի քանի մարտկոց գնել»,– ասված է հոդվածում։

Ընդ որում, վերլուծաբանները նշում են այն փաստը, որ բավարար մարտկոցներով ամրացված «Երկաթե գմբեթը», ամեն դեպքում, իր բացասական կողմերն ունի, օրինակ, այն դժվարությամբ է դիմանում հեռահար հրթիռների կրակին։ «Երկաթե գմբեթ» համակարգը նախատեսված է առաջին հերթին հրետանային հրթիռների եւ ականանետների սպառնալիքների զսպման համար։ «Չնայած չի սպասվում, որ Լեռնային Ղարաբաղում մարտական գործողությունները կհասնեն ապրիլին ծավալված բռնության պոռթկման մակարդակի, մարտական գործողությունները կարող են սաստկանալ։ Այդուհանդերձ, հրետանային հրթիռներն ու ականանետ կրակը հաճախ են օգտագործվում Լեռնային Ղարաբաղում, եւ «Երկաթե գմբեթը» կարող է օգնել պաշտպանել շփման գծին մոտ քաղաքները եւ բազաները»,– նշում են հեղինակները։