Ինչ հագնել Նոր տարվա գիշերը. խորհուրդներ դիզայներ Դիանա Շատվերյանից

Շուտով Ամանոր է, եւ յուրաքանչյուր կին ցանկանում է տոնական երեկոյին ներկայանալ ամենանրբագեղ հագուստով ու դիմահարդարմամբ: Բայց շատ անգամ հայելու առաջ փորձելով կես դյուժին շորեր, այդպես էլ չի կողմնորոշվում՝ ինչ հագնել Նոր տարվա գիշերը, ինչ գույներ եւ աքսեսուարներ ընտրել՝ առանձնանալու բոլորից եւ տոնն անցկացնելու հիացական հայացքների ներքո:

Գրագետ խորհուրդներ ստանալու նպատակով Armtimes.com-ի թղթակիցը զրուցեց հայտնի դիզայներ Դիանա Շատվերյանի հետ, ով մասնագիտական դիտարկումներ ներկայացրեց ոչ միայն Ամանորի գիշերը շլացուցիչ տեսք ունենալու, այլ նաեւ ամբողջ տարին ճաշակով հագնվելու վերաբերյալ:

Եվ այսպես, ինչ հանգել Նոր տարվա գիշերը: Ընտրությունը, ըստ դիզայների, պետք է կանգնի առավելապես փայլուն կտորներից հագուստների վրա: Կանացի հագուստի մեջ պետք է անպայմանորեն լինեն ատրիբուտներ, որոնք ամբոխից կառանձնացնի իրենց տիրուհուն: Գույներից նախապատվություն պետք է տալ կարմիրին եւ ոսկեգույնին: «Իհարկե, արդիական եւ նորաձեւ է լինելու նաեւ սեւի եւ սպիտակի համադրությունը՝ որպես հիմք: Նույնիսկ այն դեպքում, երբ չգիտեք՝ ինչ հագնել կամ խուսափում եք կարմիրից ու ոսկեգույնից, վստահ կարելի է ընտրել սեւի ու սպիտակի համադրությունը: Չկա մեկը, ում այն չսազի»,- նկատեց Դիանա Շատվերյանը՝ հավելելով, որ 2017-ին նորաձեւ են լինելու նաեւ կրծքազարդերը (բրոշներ՝ խմբ.):

Ինչ վերաբերում է կտորներին՝ առհասարակ, ապա 2017-ին նախապատվությունը պետք է տալ բնական հումքից գործվածքներին՝ բուրդ եւ բամբակ՝ ըստ սեզոնայնության: Սինթետիկայի կիրառությունը պետք է հասցնել նվազագույնի: Իսկ ահա դենիմ կտորներից (խոսքը ջինսերի մասին է՝ խմբ.) տաբատները, վերնաշապիկները, ժիլետներն ու վերարկուները բավական արդիական կդիտվեն ինչպես այս, այնպես էլ գալիք տարում: Դենիմ սթայլը լինելու է 2017-ի ամենաթրենդային ոճերից մեկը:

Անդրադառնալով կոշիկների նորաձեւությանը՝ դիզայները տեղեկացրեց, որ Աքլորի տարում նորաձեւ են լինելու բոլոր այն ձեւերը, որոնք նորաձեւ են եղել 2016-ին: Առանձնակի ուշադրություն պետք է հատկացնել սպորտային կոշիկներին: Առհասարակ, գալիք տարի սպորտային ոճը մեծ թափով է մտնելու մարդկանց առօրյա: Սակայն նորաձեւության գիտակի խոսքով, պետք է սովորել ռեստորան կամ տոնական երեկոյի չներկայանալ առօրյա ոճով՝ առավել եւս սպորտային կոշիկներով:

Դիանա Շատվերյանին խնդրեցինք անդրադառնալ նաեւ դիմահարդարման առանձնահատկություններին: Վերջինս նշեց, որ ինչպես կտորների ընտրության, այնպես էլ դիմահարդարման մեջ, նախապատվությունը պետք է տալ բնական գույներին: Ոչ մի հստակ գիծ կամ ընդգծված այտոսկրեր: Նույնը վերաբերում է  աչքերի դիմահարդարմանը: Արաբական ոճի շեշտադրումներն այստեղ ուղղակի անտեղի են: