Իդլիբը նույնպե՞ս Հալեպի դժոխքով կանցնի

Երեկ Սիրիայի հարցով ՄԱԿ–ի հատուկ դեսպանորդ Ստաֆան դե Միստուրան համատեղ մամլո ասուլիս է տվել Ֆրանսիայի արտգործնախարար Ժան–Մարկ Էրոյի հետ և հայտարարել, թե առանց զինադադարի կամ քաղաքական համաձայնության՝ Սիրիան կարող է Իդլիբի տեսքով նոր Հալեպ ունենալ:

Դիվանագետն, իհարկե, նաև Հալեպին է անդրադարձել՝ նշելով, թե քաղաքում դեռևս 50000 մարդ կա, նրանց թվում՝ 40000 խաղաղ քաղաքացիներ, և ՄԱԿ–ը պիտի ամեն բան անի, որպեսզի, հատուկ դիտորդների ներկայությամբ, հնարավոր լինի այդ մարդկանց անվնաս տարհանել, հումանիտար խնդիրներ լուծել և Ասադի ռեժիմին արգելել ռեպրեսիաները:

Ռուսական կողմը, զինվորական ներկայացուցչի շուրթերով, այս հայտարարությանն անուղղակի, բայց կոշտ պատասխան է տվել: Այստեղ հասկացրել են, որ միջազգային բոլոր հարթակներում, այդ թվում՝ ՄԱԿ–ում, հիմնականում գրոհայինների, ոչ թե խաղաղ քաղաքացիների շահերն են պաշտպանում և շտապել են հանգստացնել բանագնացին՝ նշելով, թե Սիրիայի կառավարական ուժերն ու ռուսական զինուժը հումանիտար միջանցք են բացել այդչափ գուրգուրելի ահաբեկիչների համար: Ժամեր անց նաև Euronews–ը հաստատեց, որ Հալեպում եղած գրոհայիններն, իրենց ընտանիքներով, ավտոբուսների շարասյուներով ու գնացքով, անվաս հեռացել են քաղաքից՝ տեղափոխվելով Իդլիբի նահանգ: Հետաքրքիր է, որ՝ Կարմիր խաչի ներկայացուցիչների զգոն ուղեկցությամբ: Էլ ավելի հետաքրքիր էր այն փաստը, որ միայն գրոհայինների մեծ մասի խաղաղ տարհանումից հետո ԱՄՆ պետքարտուղար Ջոն Քերին վերադարձավ իր նախկին լեքսիկոնին՝ հնարավոր ու անհնար բոլոր բռնություններում մեղադրելով Ասադի ահաբեկչական ռեժիմին և մոռանալով խաղաղ համաձայնության իր երազանքի մասին:

Հանգամանք, որ չէր վրիպել Իրանի ուշադրությունից: Այստեղ Իսլամական հեղափոխության պահապանների կորպուսի նախկին հրամանատար, ներկայում՝ ԻԻՀ Համակարգի նպատակահարմարությունը որոշող խորհրդի քարտուղար Մոհսեն Ռեզային հայտարարել է, որ կասկած անգամ չունի, թե ինչու են իրական ահաբեկիչներին այդքան խնամքով տարհանել Հալեպից: Ինստագրամի իր էջում Ռեզային գրել է, թե իրենք տեղյակ են, որ վերջին օրերին, ակնհայտ պարտություն կրած ահաբեկիչներին աջակցելու նպատակով, մի քանի թուրքական, ամերիկյան և սաուդի գեներալներ են ժամանել Սիրիա՝ արդեն իսկ կոնկրետ օպերացիա իրականացնելով Հալեպից Դամասկոս տանող ճանապարհի վրա տեղակայված Խան–Թումենեում, որ հարակից է Իդլիբին: Մոհսեն Ռեզային ասել է, թե ցանկացած պահի է հնարավոր ապացուցել այն փաստը, որ ահաբեկիչները հենց հիմա էլ զենք, զինամթերք, ֆինանսներ ու մթերք են ստանում վերը նշված երկրներից, և որ այդ ամենը Սիրիա է հասցվում թուրքական Իսկենդերուն նավահանգստից: Իրանական Ֆարս գործակալությունն էլ հավաստում է, թե իրենց ձեռքի տակ եղող ակնհայտ տեղեկատվության համաձայն՝ Թադմորի, իսկ ավելի կոնկրետ՝ Պալմիրայի վրա գրոհած ԴԱԻՇ–ականները հենց Թուրքիայից են ժամանել, ընդ որում՝ հատուկ ուսումնառություն անցնելուց հետո:

Ամերիկյան Century Foundation փորձագիտական կենտրոնը խիստ անհանգստացած է այս տեղեկություններից: Փորձագետ Ահարոն Լունդը երեկ տեսակետ է հայտնել, թե՝ եթե ռուսները, իրանցիները կամ ինքը՝ Ասադը, իսկապես ապացույցներ մեջտեղ բերեն, որ ԱՄՆ–ն ու կոալիցիան Իդլիբը Ֆաթհ ալ–Շամի բույնն են դարձրել, որի Նուսրայի ճակատը Ալ–Քաիդայի թևն է, դա նախ մեծագույն խայտառակություն կլինի, և հետո՝ անիմաստ ձեռնարկ, որովհետև ահաբեկիչները կարծես թե որևէ շանս չունեն այլևս՝ Սիրիայում հաջողության հասնելու: Այնպես, որ՝ թե ինչպես կզարգանան հետագա իրադարձությունները, դեռ վաղ է ասել, բայց որ Իդլիբում իսկապես մտահոգիչ իրավիճակ է ստեղծվում՝ ակնհայտ է: Երեկ կեսօրին մոտ, սիրիական Sana գործակալության հաղորդմամբ, կառավարական ուժերը շտապ օգնության մեքենաներ և այլ փոխադրամիջոցներ էին ուղարկել՝ հիվանդներին ու առանձին ընտանիքների տարհանելու նպատակով: Պարզ չէր՝ գրոհայինների համաձայնությա՞մբ, թե՞ որևէ այլ կերպ…