Արցախյան և հայաստանյան մարտական գործողությունների ընթացքում զոհվածների ընտանիքների գույքահարկը մասամբ կփոխհատուցվի

Հայրենական Մեծ պատերազմի վետերանների, Արցախյան և Աֆղանստանի պատերազմում զոհվածների, ինչպես նաև Հայաստանի և Արցախի մարտական գործողությունների ընթացքում զոհվածների ընտանիքների գույքահարկը որոշ չափով կփոխհատուցեն:

Երևան քաղաքի ավագանին որոշում է ընդունել սահմանել գույքահարկի գծով արտոնություն նշված խմբերում ներառված անձանց սեփականության իրավունքով պատկանող Երևան քաղաքում հաշվառված գույքահարկով հարկվող օբյեկտ համարվող բնակելի նշանակության շինությունների, իսկ դրանց բացակայության դեպքում` Երևան քաղաքում հաշվառված գույքահարկով հարկվող օբյեկտ համարվող այն բնակելի նշանակության շինությունների մասով, որտեղ հաշվառված են նշված անձինք` նվազեցնելով արտոնություն սահմանելու օրվա դրությամբ գույքահարկի գծով առկա հարկային պարտավորությունները:

Այս որոշմամբ սահմանված գույքահարկի գծով արտոնությունները տարածվում են` Հայրենական Մեծ պատերազմի մասնակից վետերանների, Հայրենական Մեծ պատերազմի մասնակիցների կարգավիճակին հավասար դասվող (հավասարեցված) անձանց, Արցախյան և Աֆղանստանի պատերազմներում զոհվածների, ինչպես նաև Հայաստանի Հանրապետության և Լեռնային Ղարաբաղի պաշտպանության մարտական գործողությունների ընթացքում վիրավորված և ստացած վնասվածքներից` հաջորդող տարիների ընթացքում, մահացածների ընտանիքների, Արցախյան և Աֆղանստանի պատերազմների 1–ին և 2–րդ խմբի զինհաշմանդամների վրա, որոնք գույքահարկով հարկվող օբյեկտ համարվող բնակելի նշանակության շինությունները ձեռք են բերել կամ դրանցում հաշվառվել են մինչև այս որոշման ուժի մեջ մտնելը:

Ըստ «Գույքահարկի գծով արտոնություններ սահմանելու մասին» Երևան քաղաքի ավագանու որոշման նախագծի՝ գույքահարկի արտոնությունների համար նախատեսվում է հատկացնել մոտ 4 միլիոն դրամ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ