Պերուում սոցցանցերում տարածված լուրերը քիչ էր մնում ինքնադատաստանի պատճառ դառնային

Պերուում ամբոխը փորձել է ինքնադասատան տեսնել Quantum ընկերության մարկետինգային հետազոտություններ կատարող երկու աշխատակիցների հանդեպ, կարծելով թե նրանք մարդու օրգանների վաճառքով են զբաղված, հայտնում է BBC–ի Ռուսական ծառայությունը։

Դեպքը տեղի էր ունեցել Լիմա մայրաքաղաքի Խայկանե արվարձանում։

Պարզվել է, որ մինչ այդ համացանցում լուրեր էին տարածվել այն մասին, որ քաղաքում սկսել են մահացած երեխաների գտնել առանց ներքին օրգանների։ Որոշ հրապարակումներում հիշատակվում էին, որ երեխաների մարմինների վրա գումար էր դրված կամ շնորհակալական գրություններ։

Չնայած իշխանությունները հերքել էին այդ լուրերը՝ բայց Խայկանի բնակիչների շրջանում տագնապ էր սկսվել։ Նրանք որոշել էին, որ «դռնից դուռ» մեթոդով հարցում իրականացնող աշխատակիցները իրականում հարմար «զոհ» են որոնում, որ հետո սպանեն նրան։

Տուժածներից մեկը, Լուիս Նունյեսը, պատմել է, որ իրեն ու իր գործընկերոջը շրջապատել, սկսել են ծեծել նրանց ու փորձել են այրել։

Երբ ոստիկանությունը պաշտպանել է մարկետոլոգներին ու նրանց բաժանմունք տարել, սկսվել են  զանգվածային անկարգություններ։ Բնակիչները շենքի վրա քարեր են նետել ու մի քանի մեքենա այրել։

Իրավապահները արցունքաբեր գազ են կիրառել։ «Ռոյթերի» տվյալներով, ավելի քան մեկ տասնյակ ոստիկան վիրավորվել է ու անկարգությունների ավելի քան 30 մասնակից ձերբակալված է։ Զոհվել է մի կին, որը անկարգություններին անմիջական մասնակցություն չի ունեցել։ Իշխանությունները պարզում են նրա մահվան հանգամանքները։

Դիտորդների կարծիքով տեղի ունեցածը ուշագրավ է նախ նրանով, որ ցույց է տալիս, թե Պերուի աղքատ շրջանների բնակիչները որքանով չեն վստահում ոստիկանությանն ու առհասարակ պետությանը։