Զոհրաբյանի ֆանտազիաները
Ազգային ժողովում «Կուսակցությունների մասին օրենքի» նախագծի քննարկման ընթացքում (օրենքն արդեն ընդունվել է առաջին ընթերցմամբ) օրենքի «ջախջախիչ» քննադատությամբ հանդես եկավ ԲՀԿ խմբակցության ղեկավար Նաիրա Զոհրաբյանը՝ նշելով, թե նոր օրենքը առավել մեծ հնարավորություններ է տալու մարդ-կուսակցությունների բազմացման համար։ Անշուշտ, կուսակցությոնների ձևավորման ազատականացման ուղղված օրենքը նման գործընթացների հնարավորությունը չի բացառում, սակայն սա բոլորովին այլ խնդիր է։
Առավել հետաքրքիր է այն փաստը, որ այս մասին «արմատական» ելույթներ է ունենում նույնպիսի մարդ-կուսակցության ներկայացուցիչը։ Առաջին հայացքից կարող է թվալ, թե ԲՀԿ-ն այն ուժն է, որը չի կարելի համարել մարդ-կուսակցություն՝ հաշվի առնելով այս կուսակցության հավաքած ձայները նախորդ խորհրդարանական ընտրություններում։ Սակայն ըստ էության ներկայումս պետք է խոստովանել, որ ներկայիս Բարգավաճ Հայաստան կուսակցությունը շատ հեռավոր աղերսներ ունի երբեմնի հզոր կուսակցության հետ։
Վերջիվերջո ակնհայտ փաստ է, որ Գագիկ Ծառուկյանի՝ քաղաքականությունից հեռանալուց հետո, ԲՀԿ-ն վերածվեց անդեմ քաղաքական ուժի, ինչքան էլ որ փորձի հակառակն ապացուցել Նաիրա Զոհրաբյանը։ Բնականաբար այս մասին է վկայում այն պարզ իրողությունը, որ Ծառուկյանի հեռանալուց հետո ընդամենը օրերի ընթացքում կուսակցությունը տրոհվեց մի քանի մասի։ Թերևս Նաիրա Զոհրաբյանը չի ուզում տեսնել այս այս փաստը, դա անշուշտ իր խնդիրն է, սակայն երբ փորձում է նման աչքակապություն պարտադրել նաև հասարակությանը, ապա պետք է արձանագրել, որ սույն քաղաքական ուժը ոչ միայն իր շուրջը չի ձևավորվել, այլև ընդհանրապես իր գլխավորած ԲՀԿ-ն դժվար է նույնիսկ քաղաքական ուժ համարել։
Նման պայմաններում առավել զարմանալի է դառնում վերջերս Զոհրաբյանի հարցազրույցներից մեկում առաջ քաշած այն թեզը, թե ԲՀԿ-ն կարող է դաշինք կազմել միայն իր «քաշի» քաղաքական ուժի հետ։ Դժվար է հասկանալ, թե ինչ քաշի մասին է խոսքը այն պայմաններում, երբ ակնհայտ է, որ ԲՀԿ-ին քաշ ու կշիռ հաղորդում էր Ծառուկյանի անձը։ Նույն հարցազրույցում Զոհրաբյանը ակնարկում է, որ Ծառուկյանի վերադարձը ԲՀԿ մեծապես կհզորացնի կուսակցությանը։
Նման ակնարկներից արդեն տպավորություն է ստեղծվում, թե Զոհրաբյանը պարզապես ուզում է ԲՀԿ, ներկայիս բավական աննախանձելի վարկանիշի խնդիրը լուծել Ծառուկյանի անվան շահարկմամբ, այն պայմաններում, երբ Ծառուկյանը որևէ հայտարարություն չի արել քաղաքականության վերադառնալու մասին, էլ չասած, որ համաձայն ակտիվացած լուրերի, Ծառուկյանի քաղաքականություն հնարավոր վերադարձը չի դիտարկվում ԲՀԿ շարքերում։
Վերջապես թերևս պետք է հիշեցնել Զոհրաբյանին, որ վերջինս ԲՀԿ մնացորդների նախագահի պոստում է հայտնվել զուտ հանգամանքների պատահական բերումով և ոչ թե սեփական քաղաքական կապիտալի կամ գործունեության արդյունքում, ինչը բավարար է, որպեսզի նա հանդես չգա նախկին ԲՀԿ-ի անունից կամ որդեգրի այնպիսի կեցվածք, կարծես թե անձամբ իր կուսակցությամբ կարող է ղեկավարել խոշոր քաղաքական գործընթացներ կամ որ առավել զավեշտալի է՝ Գագիկ Ծառուկյանի քաղաքականություն վերադարձի պրոցեսը։
Աղասի Մարգարյան
PressMedia.am վերլուծաբան
1
2
3
4
5
1
2
3
4
1
2
3
5
