Սուրիկ Խաչատրյանը` որդու մասնակցությամբ միջադեպի լուրերի մասին

Արդեն հայտնել էինք, որ «Օջախ» ռեստորանային համալիրից Աբովյանի բժշկական կենտրոն է տեղափոխվել Չարենցավան քաղաքի 17 շենքի 17 բնակարանի բնակիչ, 22-ամյա Տիգրան Հակոբի Շահգալդյանը` Կոտայքի նախկին մարզպետ Կովալենկո Շահգալդյանի թոռը: Վերջինս ոտքերի եւ նստատեղի հատվածում ունի սուր-կտրող-ծակող առարկայից ստացած հետքեր: Մամուլում լուրեր տարածվեցին, որ կասկածներ կան, որ նրան դանակարահել է Սյունիքի նախկին մարզպետ` Սուրիկ Խաչատրյանի տղան:

Սյունիքի նախկին մարզպետ Սուրիկ Խաչատրյանը հերքում է տեղեկությունը, թե իր որդին է դանակահարել Կոտայքի նախկին մարզպետ Կովալենկո Շահգալդյանի թոռանը՝ 22-ամյա Տիգրան Շահգալդյանին:

Սուրիկ Խաչատրյանը նշել է, որ իր որդուն ոչ մի կապ չունի նման միջադեպի հետ: Նա, սակայն, չի հերքել որ իր որդին եւ Շահգալդյանի թոռը մտերիմներ են եւ վաղուց են ճանաչում իրար:

Այսօր ավելի վաղ Կովալենկո Շահգալդյանը միջադեպի հետ կապված ասել էր. «Քիչ տոկոսով է համապատասխանում իրականությանը: Որեւէ բան չկա, թեթեւ վնասվածք է, Խաչատրյան Սուրիկի տղան էլ կապ չունի այս պատմության հետ: Կենցաղային վեճ է եղել, սուտ են տեղեկությունները, որ Սուրիկ Խաչատրյանի որդին է դանակով վնասել: Ռեստորանում ջահելների միջեւ վեճ է եղել»:

Ավելի վաղ NEWS.am-ը հայտնել էր, որ Երեւանի «Օջախ» ռեստորանային համալիրում այսօր՝ նոյեմբերի 26-ի գիշերը դանակահարություն է տեղի ունեցել:

Shamshyan.com-ի փոխանցմամբ, «Օջախ» ռեստորանային համալիրից Աբովյանի բժշկական կենտրոն է տեղափոխվել Չարենցավան բնակիչ 22-ամյա Տիգրան Շահգալդյանը: Վերջինս ոտքերի եւ նստատեղի հատվածում ունի սուր-կտրող-ծակող առարկայից ստացած հետքեր:

Շահգալդյանը Չարենցավանի քաղաքապետ Հակոբ Շահգալդյանի տղան է եւ Կոտայքի նախկին մարզպետ Կովալենկո Շահգալդյանի թոռը:

Աղբյուրի փոխանցմամբ, կասկածներ կան, որ նրան դանակարահել է Սյունիքի նախկին մարզպետ` «Լիսկա» մականվամբ Սուրիկ Խաչատրյանի տղան, ով մինչ աղջիկների եւ վիրավորի հետ «Օջախ» ռեստորանային համալիր ժամանելը եղել է Ծաղկաձորում: