Մոսկվային վախեցրել են ադրբեջանական մաֆիայով

«Լրատվամիջոցներում բարձրացված աղմուկը, որն առնչվում էր Ռուսաստանում կանաչեղենի շուկայում էթնիկ խմբավորումների միջև հարաբերությունների հնարավոր սրմանը, պատվիրված է և ուղղված է վիճակի ապակայունացմանը»,– համարում է իրավիճակին ծանոթ աղբյուրը:

Գաղտնիք չէ, որ հետխորհրդային ամբողջ տարածքում գյուղմթերքի շուկաների գրեթե ամբողջ առևտուրը ավանդաբար ադրբեջանցիների ձեռքում է, ովքեր դրանից առատորեն մաս են հանում «յուրային» փոքրաթիվ «օրենքով գողերին», ինչն ապահովում է թե՛ մեկ, թե՛ մյուս կողմի բարձր բարեկեցությունը: Իր անունը չնշելու պայմանով` աղբյուրը Primecrime կայքին պատմել է այդ «կարկանդակի» և այն կիսելու մասին: Նրա խոսքով` Բախտիյարի ժամանակ ադրբեջանցի գողերը եկամուտը միմյանց միջև բաժանում էին հարաբերականորեն հավասար: Այն բանից հետո, երբ սպանված գողեր` Սեյմուրի, Իկմետի ու Չինգիզի առևտրականներին «իր տանիքի» տակ է առել Ռովշանը, «հավասար մասնաբաժնի» սկզբունքը խախտվել էր: Ռովշանի ադրբեջանական բիզնեսը ժառանգելու փորձը, որը նրա սպանությունից հետո կատարեցին Կախա Պարպալիան և Լևան Ջանգվելաձեն` Մերաբի եղբայրը, չստացվեց այն պատճառով, որ ադրբեջանցիները ցանկանում էին, որ իրենց տանիքը լինի հայրենակից մեկը:

Մինչ մյուսները բավարարվում են սեղանի մնացորդներով, բոլոր շուկաներն սկսել են վերահսկել երկու խոշոր խաղացողներ` նախկինում Ռովշանի ոխերիմ թշնամիները` Վագիֆը և Գուլին, որոնց միջև լիակատար փոխըմբռնում կա, համենայնդեպս մինչև այն պահը, երբ Գուլին ազատ կարձակվի: Չի բացառվում, որ մամուլում լարվածության արհեստական մեծացումը կարող է հանգեցնել ադրբեջանցի գողերի նոր ձերբակալությունների: