Ապրում եմ զինվորական կացարանում, հերթագրված սպասում եմ բնակարանի իմ հերթին. ՊՆ խոսնակ (լուսանկարներ)

ՀՀ պաշտպանության նախարարության մամուլի խոսնակ Արծրուն Հովհաննիսյանը բնակարան չունի եւ ապրում է զինվորական կացարանում: Այս մասին ի պատասխան Araratnews.am-ի հարցին՝  ասաց ռազմական գերատեսչության մամուլի պատասխանատուն:

«Ես զինվորական եմ, ապրում եմ զինվորական կացարանում, հերթագրված սպասում եմ իմ բնակարանի հերթին»,- նշեց մեր զրուցակիցը՝ անդրադառնալով ֆեյսբուքյան օգտատերերից մեկի՝ այսօր կատարած գրառմանը:

Նշենք, որ Ալբերտ Պողոսյանը, որը ներկայացել է որպես Արծրուն Հովհաննիսյանի բանակային ընկեր, ֆեյսբուքյան իր էջում լուսանկարներ է հրապարակել՝ հետևյալ գրառմամբ. «Նոր իմացա, որ որոշ ապուշներ գրել են, որ իմ բանակային ընկեր Արծրուն Հովհաննիսյանը դղյակում ա ապրում: Որ երեխուն 700.000 մանկապարտեզ ա տանում: Աաաաաաաաաա….

Գիտեք, չեմ մտածում որ վատա, երբ մարդիկ հարցեր են տալիս: Բայց մտածում եմ, ինչքան հիվանդ ա մեր հասարակությունը, որ չի կարում էլ տարբերի, որ ով է իսկականից ազգի համար մի բան անում, և ով գռփում ազգը:

Նաև երեկ որոշ անուղեղներ անգամ կասկածում էին, որ նա ծառայել ա բանակում: Hovak Alaverdyan, Aram Karapetyan, Garik Margaryan դուք հաստատ կավելացնե՞ք մի բան ձեր կողմից: Այսօր ապացույցների երեկո պետք է անենք:

Իրա զինվորներից հարցրեք` ոնց էր ծառայում: Ուզում եք տեսնե՞լ, ոնց ա ապրում Արծրունը: Ի դեպ, նկարներից մեկը հենց ինքը իր կնոջ հետ հենց այդ տանը»:

Գրառման հետ կապված՝ Արծրուն Հովհաննիսյանն ասաց հետևյալը. «Ցավոք, մեր երկրում ոչ ոքի չեն հարցնում՝ ինքը կո՞ղմ է, թե՞ դեմ իր անձնական կյանքի եւ այլ մանրամասների լուսաբանմանը՝ թե ՛ մեր դեմ, թե ՛ մեր օգտին»:

Իսկ հարցին` իսկապե՞ս Հովհաննիսյանն այդտեղ է բնակվում, ՊՆ խոսնակը հրաժարվեց այդ մասին խոսելուց:

«Ես, իհարկե, կարող եմ ասել, բայց իմ ասելը կնշանակի՝ դիրքորոշում հայտնել նման մոտեցումներին: Էս երկիրը շատ փոքր է, ցանկացած մարդ կարող  է ճշտել»,- հավելեց պաշտպանության նախարարության մամուլի խոսնակը:

Լուսանկարները՝ Ալբերտ Պողոսյանի ֆեյսբուքյան էջից

Աղբյուրը՝ Araratnews.am :