Աղբյուր. Հունաստանի պաշտպանության նախարարը Թուրքիային նախագուշացրել է հրաժարվել սահմանների վերանայումից
Միջազգային
Հունաստանի ազգային պաշտպանության նախարար Պանոս Կամենոսը Թուրքիայի նոր դեսպան Յաշար Խալիթ Չեւիքի հետ հանդիպմանը Անկարային նախազգուշացրել է հրաժարվել 1923 թվականի Լոզանի պայմանագրի եւ սահմանների վերանայման փորձերից: Այս մասին «ՌԻԱ Նովոստի»-ին հայտնել են երկու աղբյուրներ:
Հունաստանի պաշտպանության նախարարությունը այս տեղեկությունը պաշտոնապես ոչ հաստատել է, ոչ հերքել:
1923 թվականի հուլիսին մի կողմից Մեծ Բրիտանիայի, Ֆրանսիայի, Իտալիայի, Ճապոնիայի, Հունաստանի, Ռումինիայի, Հարավսլավիայի, մյուս կողմից Թուրքիայի միջեւ կնքված Լոզանի խաղաղության պայմանագրով սահմանվել են Թուրքիայի նոր սահմանները՝ դրանով իսկ իրավաբանորեն ձեւակերպելով Օսմանյան կայսրության փլուզումը: Այս շաբաթ իր վերջին հայտարարությամբ Էրդողանը Թուրքիայի ժամանակակից սահմանները հաստատած Լոզանի պայմանագրի վերանայման ցանկություն է հայտնել: Հունաստանում նշել են, որ արդի պատմության մեջ առաջին անգամ Թուրքիայի ղեկավարությունը բացահայտ կասկածի տակ է դնում Լոզանի պայմանագիրը եւ երկու երկրների միջեւ սահմանները:
Չորեքշաբթի Հունաստանի պաշտպանության նախարարությունը մամուլի հաղորդագրություն է տարածել, որի համաձայն՝ Կամենոսը ընդունել է սեփական խնդրանքով «քաղաքավարական այց կատարած» Աթենքում Թուրքիայի նոր դեսպան Յաշար Խալիթ Չեւիքին: Հանդիպման մանրամասները չեն հաղորդվել:
«ՌԻԱ Նովոստի»-ի հարցմանն ի պատասխան փորձագետները հանդիպումը տարբեր կերպ են գնահատել: Գործակալության աղբյուրներից մեկի կարծիքով, որը ծանոթ է զրույցի բովանդակությանը, Կամենոսը «փաստացի դեմարշով է հանդես եկել»՝ Թուրքիայի նախագահ Թայիփ Էրդողանի հերթական հայտարարության հետ կապված, որ Թուրքիան երկրի, այդ թվում՝ Հունաստանի հետ ժամանակակից սահմանները հաստատած «Լոզանի պայմանագիրը վերստին կքննարկի»:
Մյուս աղբյուրն, իր հերթին, ճշտել է, որ նախարարն իր դժգոհությունն է հայտնել եւ «դա կոպիտ է արել», բայց դա չի կարելի դեմարշ անվանել, քանի որ ոչ պաշտոնապես է արտահայտվել:
1
2
3
4
5
1
2
3
4
5
2
