Իրավական խորհրդատու

Հարց – Կա՞ն, արդյոք, հանգամանքներ, երբ նվիրատվությունը կարելի է վերացնել և նվեր տվածը հետ պահանջել:

Պատասխան – Այո, օրենսդրությունը նման դեպքեր նախատեսում է: Օրինակ, նվիրատուն իրավունք ունի վերացնել նվիրատվությունը, եթե նվիրառուն նվիրատուին դիտավորյալ պատճառել է մարմնական վնասվածքներ:

Հարց – Մեր ընտանիքին պատկանող 1 հեկտար հողամասը վարձակալությամբ` 5 տարի ժամկետով, տվել ենք Ա.Զ.–ին՝ հացահատիկ ցանելու համար: Այդ հողամասում, սակայն, կան պտղատու ծառեր: Երբ մենք ցանկացել ենք այդ ծառերի բերքը հավաքել, մեր վարձակալ Ա.Զ.–ն դա արգելել է` ասելով, որ բերքն իրեն է պատկանում: Մենք համաձայն չենք դրա հետ, քանի որ հողամասը մենք տվել ենք վարձակալությամբ՝ հացահատիկ ցանելու համար: Ի՞նչ կարելի է անել մեր իրավունքները պաշտպանելու համար:

Պատասխան – Ըստ Ձեր ներկայացրած իրավիճակի, վարձակալ Ա.Զ.–ն իրավացի է, քանի որ եթե այլ բան նախատեսված չէ վարձակալության պայմանագրով, ապա վարձակալած գույքի օգտագործման արդյունքում վարձակալի ստացած պտուղները, արտադրանքը և եկամուտը պատկանում են վարձակալին: Տվյալ դեպքում, Դուք վարձակալությամբ տվել էք ամբողջ հողամասը, այդ թվում՝ վրայի ծառերը:

Հարց – Մեր շենքի նկուղում առանձնացրել եմ 10 քառակուսի մետր տարածք՝ ինձ համար ստեղծելով խորդանոց: Համատիրությունը պահանջում է դրա դիմաց վճարել վարձավճար, որի հետ ես համաձայն չեմ: Իրավացի՞ է, արդյոք, համատիրության պահանջը:

Պատասխան – Ձեր շենքի բոլոր տարածքները, այդ թվում՝ նկուղը, պատկանում են շենքի սեփականատերերին (բնակիչներին), սեփականության իրավունքի տեսանկյունից համատիրությունը դրա հետ որևէ կապ չունի: Ուստի նման պահանջ Ձեզ առաջադրել չի կարող: