Արամ Սարգսյան. Գողանալով հայրենասիրությունից խոսելը փարիսեցիություն է
Վերլուծություն
Հայաստանի Դեմոկրատական կուսակցության նախագահ Արամ Սարգսյանը կառավարության` յուրաքանչյուր աշխատողից 1000–ական դրամ պահելու ծրագրի շուրջ սկսված աղմուկն անիմաստ է համարում: Նրա կարծիքով, եթե կառավարությունն իսկապես ուզում է բանակին օգնություն ցույց տալ, ապա պետք է ոչ թե աշխատողներից գումար գանձելու ճանապարհով գնա, այլ՝ ստվերը կրճատելու: Բացի այդ, իշխանությունները նաև պետք է հաշվետվություն պահանջեն, թե ինչ է արվել պետական պարտքի գումարներով, ով ինչքան է «մսխել» և ովքեր են մեղավորները.
«Դեռ պարզ չէ, թե ինչպես է ստացվել, որ ստվերն ուռճացել է մինչև 60–70 % և եթե կառավարությունն իսկապես ուզում է գլոբալ հարցեր լուծել, ապա պետք է գնա այդ ճանապարհով: Բայց քանի որ նրանք չեն ուզում համակարգ փոխել, դրա համար էլ դեմագոգիայով են զբաղված»,– PressMedia.am-ի հետ զրույցում ասաց Ա. Սարգսյանը:
Նրա խոսքով՝ ոչ ոք չի ափսոսի իր 1000 դրամը մեր բանակին տալ, բայց հարցն, ըստ նրա, այդպես չի լուծվում: Բացի այդ, նախ հարկավոր էր ժողովրդի գումարները չգողանալ, հետո նոր խոսել հայրենասիրության, բանակի կամ զինվորի մասին: «Մի կողմից գողանալը, իսկ մյուս կողմից ժողովրդին ասելը, թե դա հայրենասիրություն է, փարիսեցիություն է բառիս բուն իմաստով: Եթե հավասար պայմաններ լինեին և չլինեին այս բոլոր այլանդակությունները, ոչ ոք էլ չէր խոսի 1000 դրամ կամ ավելի շատ գումար տրամադրելու մասին: Ով կարող էր ավելին կտար, բայց անարդարություն տեսնելով, մտածում են, թե ինչու՞ պետք է նրանց փոխարեն գումար տրամադրի: Սա է հարցը»,– ասում է Ա. Սարգսյանը:
Խոսելով նոր կառավարության կողմից իրականացվող քայլերի մասին Դեմոկրատական կուսակցության առաջնորդը կարծում է, որ իրականացվող քայլերը դեռ պետք է դառնան անդառնալի: Ու երբ նման քայլեր իրականացվեն, այդ դեպքում կուսակցությունը կտա իր գնահատականը:
«Հիմա մենք ասում ենք, որ եթե կառավարությունը ճիշտ քայլեր կատարի, շատ ուրախ կլինենք և կաջակցենք, բայց քայլերը պետք է հետևողական լինեն և բերեն մինչև վերջնական արդյունքի: Մինչև 25 տարիների ընթացքում Հայաստանում իրականացված քայլերին քաղաքական և իրավական գնահատական չտրվի, որևէ լուրջ քայլ անել հնարավոր չի լինի: Փոփոխությունները պետք է այդպիսին լինեն, որպեսզի հույս և հավատ ներշնչեն ժողովրդի մոտ»,– ասում է Ա. Սարգսյանը:
Քաղաքական գործչի համար հասկանալի չէ նաև, որ եթե իշխանությունն իսկապես ցանկանում է իրավիճակ փոխել, ապա ինչու է խրախուսում ու պարգևատրում նրանց, ովքեր իր կարծիքով պատժի են արժանի: Եվ եթե ներկայի կառավարությունը չի կարողանալու «երեկվա» քայլերի մեղավորներին պատասխանատվության հրավիրել և գողացածը հետ բերել, ապա ինչպե՞ս են երկրում իրավիճակ փոխելու: «Ես ուզում եմ հավատալ, որ ներկայի կառավարությունը կգնա նաև ստվերը կրճատելու ճանապարհով, բայց դեռ չեմ տեսնում, որ այդ ուղղությամբ լուրջ քայլեր են իրականացվում: Եթե հստակ քայլեր արվեն, այդ դեպքում մենք կպաշտպանենք իրենց: Դա միայն մեր կուսակիցների կարծիքը չէ: Հասարակության ստվար մասն այդպես է մտածում: Եվ եթե արդարության հաստատմանն ուղղված քայլեր կատարվեն, ապա հասարակությունը կպաշտպանի իրենց»,– կարծում է Ա. Սարգսյանը:
Առաջիկա խորհրդարանական ընտրություններին մասնակցելու մասին կուսակցության առաջնորդն ասաց, որ անպայման մասնակցելու են, սակայն դեռևս պարզ չէ, թե որ կուսակցության հետ դաշինք կկազմեն. «Դա այդքան էլ հեշտ հարց չի, քանի որ գործընկերները պետք է վստահություն ունենան մեկը մյուսի նկատմամբ: Այնպես որ, առաջիկա մեկ–երկու ամիսներին ամեն ինչ պարզ կլինի»:
Արմինե Գրիգորյան
1
2
3
4
5
1
2
3
4
5
