Իրավական խորհրդատու

Հարց – Դիմել եմ ոստիկանություն, հայտնելով մեքենայիս առևանգման մասին: Օրեր անց իմ դիմումն ուղարկվել է քննչական բաժին, որտեղից էլ ստացել եմ նամակ այն մասին, որ մեքենայի առևանգման դեպքով հարուցվել է քրեական գործ: Որքան տեղյակ եմ, իմ դիմումի կապակցությամբ ինձ պետք է տրամադրեին որոշում:

Պատասխան – Այո, հանցագործության մասին հաղորդում տված անձին այդ հաղորդման կապակցությամբ որոշում կայացրած իրավապահ մարմինը պարտավոր է տրամադրել կայացված որոշման պահճենը:

Հարց – Պարտադի՞ր է, արդյոք, ամուսնական պայմանագիրը կնքել մինչև ամուսնանալը:

Պատասխան – Ոչ, ամուսնական պայմանագիրը կարող է կնքվել ինչպես մինչև ամուսնության պետական գրանցումը, այնպես էլ ամուսնության ցանկացած ժամանակահատվածում : 

Հարց – Ո՞ր փաստաթղթով է սահմանվում գերեզմանի պատկանելությունը այդ ընտանիքին:

Պատասխան – Յուրաքանչյուր թաղում գրանցվում է համապատասխան տեղական ինքնակառավարման մարմնի թաղումների կամ դիակիզումների գրանցման մատյանում, որն արխիվում պահվում է անժամկետ: Մատյանում գրանցումից հետո գերեզմանատան տնօրինությունը տալիս է իր դրոշմակնիքով կնքված գերեզմանի վկայական, որը թաղման կամ աճյունասափորի տեղը հաստատող միակ փաստաթուղթն է:

Հարց – Դատարանը վճռել է ամուսնուցս բռնագանձել գումար: Ամուսնուս հետ ունենք մեզ պատկանող ընդհանուր գույք: Հնարավո՞ր է, արդյոք, որ ամուսնուս պարտքերի մարման համար բռնագանձի նաև ինձ պատկանող գույքը:

Պատասխան – Ոչ, չի կարող: Ամուսիններից մեկի պարտավորությունների համար բռնագանձումը կարող է տարածվել միայն նրա սեփականության ներքո գտնվող գույքի, ինչպես նաև ամուսինների ընդհանուր գույքում նրա բաժնի վրա: