205 համարի երթուղու վարորդները գործադուլ են արել. մարդիկ չէին կարողանում հասնել Երեւան

Նոյեմբերի 16-ից «Երեւան-Մերձավան-Նորակերտ» երթուղին սպասարկող «205» համարի երթուղայինները գիծ դուրս չեն եկել: Այս երթուղին սպասարկող միակ ընկերությունը «Շանթ Գյուրջոյան» ՍՊԸ-ն է, որն իրականացնում է նաեւ Երեւանի թիվ 63 երթուղու սպասարկումը, որը կապվում է Երեւանի քաղաքապետ Տարոն Մարգարյանի անվան հետ:

Արմավիրի մարզի Մերձավան գյուղական համայնքի ղեկավարի տեղակալ Արեւհատ Եսայանն ասաց, որ իրենց գյուղ հասնող երթուղայինները նույն մարզի Նորակերտ գյուղից երբ գալիս են, բոլոր նստարաններին ուղեւորները նստած են լինում, իսկ Մերձավանում արդեն նստելու տեղ չի լինում, մարդիկ մի կերպ տեղավորվում են երթուղայինում, որպեսզի հասնեն Երեւան: Ամիսներ առաջ համայնքապետարանը դիմել էր կառավարությանը, իսկ Տրանսպորտի, կապի եւ տեղեկատվական տեխնոլոգիաների նախարարությունից պատասխանել էին, որ քայլեր են ձեռնարկում խնդիրը կարգավորելու ուղղությամբ եւ մոտ 20 օր առաջ որոշակի բարելավում է եղել, իսկ երեկվանից, ընդհանրապես, չեն աշխատել երթուղայինները:

«Կա՛մ լավ չեն աշխատում, կա՛մ տրանսպորտի քանական է քիչ: Մենք առաջարկել ենք նաեւ մեր համայնքի համար ավտոբուս տրամադրել: Թող 15 րոպեի փոխարեն գնա 25-30 րոպե ժամանակացույցով, մենք մեծ բան չենք խնդրում: Պետք է այնպես կազմակերպել, որ մարդիկ կարողանան նորմալ հասնել Երեւան եւ հետ գան տուն»,- ասաց համայնքի ղեկավարի տեղակալը:

ՀՀ կապի, տրանսպորտի եւ ՏՏ նախարարության տրանսպորտի վարչության պետի տեղակալ Դավիթ Մելքոնյանը մեր զրույցում ասաց, որ խնդրին ծանոթ են եւ այն արդեն լուծված կարելի է համարել: Բանն այն է, որ ԱՊՊԱ ոլորտում տեղի ունեցած փոփոխությունների հետեւանքով, մեքենաների ռիսկայնության համակարգը փոխվել է: Եթե նախկինում տվյալ մեքենայի ռիսկայնություն առանձին էր գնահատվում եւ հաջորդ տարի ԱՊՊԱ պայմանագիրն ավելի թանկ էր լինում, ապա նոր կարգավորումներով՝ ռիսկայնությունը դրված է երթուղու ողջ պարկի վրա: Օրինակ՝ մի վարորդ մեքենան վթարի է ենթարկում, երթուղու բոլոր վարորդները ստիպված են լինում նոր պայմանագրի համար ավելի թանկ վճարել:

«Երեկ ամբողջ օրը չի եղել, օրվա որոշ ժամերի է եղել գործադուլը վարորդների նախաձեռնությամբ, տնօրինության հետ խոսել ենք արդեն»,- ասաց Դավիթ Մելքոնյանը՝ նշելով, որ առաջիկայում նախարարությունն Ապահովագրողների բյուրոյի հետ քննարկում է կազմակերպելու, քան որ ԱՊՊԱ համակարգի խնդիրը համակարգային է: